Dikon TpK ta desgabá ekspertonan di MEO? Si TpK no ta konfia MEO e mester manda yama e minister.

 

Dikon TpK ta desgabá ekspertonan di MEO?
Si TpK no ta konfia MEO e mester manda yama e minister.

Willemstad — Mientras ku e komishon konserni di parlamento ta
planeando su biahe pa Colombia den kuadro di legislashon pa kanabis
medisinal i su benefisionan ekonómiko, Partido PIN a lesa ku frakshon
di Trabou pa Kòrsou no ta kere den e impulso ekonómiko di kanabis
medisinal ku ekspertonan di MEO a premirá den nan raport.
Si akaso no ta un eror of simpel mal chansa Trabou pa Kòrsou a hasi
den su ekspreshonnan, orei Partido PIN ta ferwagt ku mesora komunidat
ta haña un splikashon dikón mester duda den e kapasidat i seriedat dje
ekspertonan di MEO.

Ofisial
Den un raport di novèmber 2019 Ministerio di Asuntunan Ekonomiko a
kalkulá ku si start full swing ku produkshon di kanabis medisinal i
industrial lokalmente, basá riba petishonnan di e momentu ei, den un
periodo di 3 aña ekonomia por krese ku masomenos 7 porshentu promedio,
kasi 9 mil hende lo haña trabou i kaha di gobièrnu lo gòrda ku mas di
200 mion florin .
Ta abase di e perspektiva ei i konsiente ku mester pilánan ekonómiko
nobo, duradero i konkreto, Partido PIN a move shelu i tera pa pone lei
di kanabis medisinal riba mesa. Hasta e lider di TpK mes, den tur
libertat, a sostene e proposishon di lei plenamente den ambos reunion
di komishon sentral.
Mas ainda, ta kalkulashonan manera esaki ta pone hopi ku ta protesta
kontra COHO, insisti ku no mester traga COHO pa plaka paso Kòrsou por
produsi sufisiente pa paga e sosten di likides bèk.
Awo si Trabou pa Korsou ta desbaratá e kalkulashonnan di MEO i su
ekspertonan, ta riba kiko anto mester basa pais su posibilidatnan pa
futuro? Of ta tiradónan di pará mester haña stul pa sinta?

Di tili si, ma di tala no
Den su kritika inkomprensibel riba e profeshonalismo dje ekspertonan
di MEO, e frakshon di TpK ta prefera un kalkulashon hasi pa SOAB. PIN
ta puntra: dikón ta konfia esun ofisina di gobièrnu mas k’e otro? Antu
komunidat mester ferwagt un reunion publiko den kua frakshon di TpK
tei splika e minister di MEO dikon su departamento si ta inkonfiabel?
A tira den laira tambe ku hasta Kontraloria General lo por konta mihó
k’e ekspertonan ekonómiko. Tur esaki lubidando ku meta di Kontraloria
General ta investiga efektividat i legalidat di sennan  uza. Pasamentu
di lei i prosupuesto ta keda den man di Parlamento. Ademas, komo
organo di estado, ta kon despues Kontraloria General por bai kontrola
un kos ku e mes a pusha?

Seriedat
Banda di e argumentashon konfuso, Partido PIN a keda babuka di tende e
frakshon di TpK menshona nòmber di un amtenar konsehero komo un motibu
pa duda den un lei. For di nos apresio pa tur sirbido publiko, Partido
PIN ta spera ku esaki no tei bira un ingrediente di politika nobo. Nos
ta konfia ku representantenan di trahadó no permití e maniobra aki
bira kustumber.
Mihó lo ta si parlamentarionan sigui mustra madures i atende ku nos
komunidat na serio paso banda di COHO, kresementu ekonómiko aselerá i
duradero mester ta prioridat number un.