PROMÉ MINISTER GILMAR PISAS A DUNA ATENSHON NA DIA DI ENFERMERIA BISHITANDO DIFERENTE INSTANSIA

Willemstad – Promé Minister Gilmar Pisas a duna atenshon na Dia di Enfermeria bishitando diferente instansia na Kòrsou dia 12 di mei 2022.

 

Riba e fecha 12 di mei ta selebrá Dia di Enfermeria komo un homenaje na e fecha di nasimentu di Florence Nightingale, un enfermera entrená na Inglatera, ku ta keda akreditá komo esun ku a krea Enfermeria Profeshonal.

 

Promé Minister sr. Pisas a kuminsá e dia ku un bishita na CMC (Curacao Medical Center) kaminda tabatin un bunita seremonia pa duna honor i rèspèt na e tur esnan ku ta ehersé e bunita funshon aki. 

Despues di e seremonia Promé Minister sr. Pisas den kompania di Minister di Salubridat, Medio Ambiente i Naturalesa sra. Dorothy Pietersz-Janga a bishitá algun di e departamentunan di CMC kaminda por a felisitá algun di esnan ku ta laborá den e àrea di Enfermeria.

 

A sigui ku un bishitá na Habaai, Huize Welgelegen – Birgen di Rosario, kaminda Promé Minister sr. Pisas den kompania di Minister di Salubridat, Medio Ambiente i Naturalesa sra. Dorothy Pietersz-Janga por a felisitá i duna un rosa na tur esnan ku ta laborá den e bunita i repetuoso funshon aki di Enfermeria i alabes kumindá nos grandinan ku ta hospedando na e kas aki.

 

Tabata un gran sorpresa pa e Enfermero i dòkternan ku ta laborá na Departamento Salu Hubenil na Brievengat ora ku nan a mira Promé Minister sr. Pisas kana drenta den nan departamento. Tabata reina un alegría total i hopi ta esnan ku a probechá pa saka diferente potrèt ku nan Promé Minister.

 

Pa parti anochi a invitá Promé Minister sr. Pisas na un selebrashon di Dia di Enfermeriá organisá pa e Sindikato di CBV.

 

Promé Minister sr. Pisas kier felesitá un biaha mas tur esnan ku ta laborá den e bunita funshon di Enfermeria. E loke boso ta hasi pa nos komunidat ta di aploudí i nos ta orguyoso i satisfecho ku tur loke boso ta hasi pa bienestar di nos hendenan. Masha pabien riba boso dia.