Biblioteka Públiko Boneiru ta yama bon biní na su di 3800 miembro

05/18/2022

E kantidat di miembro di Biblioteka Públiko Boneiru ta oumentando i e oferta ta sigui bira mas amplio.

Nan a yama bon biní na Elisabeth Veldbloem komo e di 3800 miembro i nan ta sigui amplia e servisionan riba tereno di entre otro aktividat i digitalisashon. Kresementu di e kantidat di miembro  ta mustra tambe ku interes pa e servisionan ta bira mas grandi.

Despues di su inskripshon mesora Elisabeth a hasi uso di un oferta nobo, esta e biblioteka online. Na momentu di inskripshon miembronan nobo por hasi petishon mesora pa esaki i huntu ku nan miembresia nan ta haña e datonan pa log in. E ora ei banda di fiamentu di buki físiko, miembronan tin akseso mesora tambe na buki digital online i buki pa skucha online.

Pa bira miembro di Biblioteka Públiko Boneiru por bishitá e biblioteka na Kaya Gramèl s/n òf por tuma kontakto via e number di telefòn 715 – 5344. Miembresia te ku 18 aña ta grátis. Pa miembro di riba 18 aña un miembresia ta kosta $ 6,- pa aña. Biblioteka Públiko Boneiru ta invitá tur hende pa bira miembro i ta deseá su miembronan hopi plaser ku lesamentu!