Minister di Cultura ta invita comunidad pa sintonisa e documentario ‘Casnan di Torto na Aruba’
Diadomingo 22 di mei pa 7or di anochi atrabes di Diaro TV Canal 48
ORANESTAD – ‘Casnan di Torto na Aruba’ ta e documentario di Fundacion Herencia Historico di Aruba cu recientemente a wordo presenta. E documentario ta mustra con prome cu refineria Lago y Arend, tabata traha cas na Aruba. Un bunita documentario cu ta corda nos riba e creatividad, e forza y e resiliencia di e Pueblo di Aruba.
Aruba a conoce pobresa grandi prome cu e refineria a establece su mes na nos Pais. Asina mes nos Pueblo a usa su creatividad pa hunto cu naturalesa traha nan cas. Den e construccion tabata usa material di naturalesa, manera klei, awa, yerba seco pa traha e torto, y palo di mata y cadushi pa e structura di e cas. Tabata tene debido cuenta tambe na ki momento ta corta mata pa haya e palonan y tabata situa e cas conforme e pasada di aire y posicion di solo.
E trahamento di cas di torto tabata un trabou duro pa cual famia, bisiña y amigo tabata bin hunto pa forma e union cu ta crea e forsa necesario pa traha e cas. Di e manera aki di hopi tempran nos Pueblo tabata practica e union cu ta necesario pa logra bienestar y pa surpasa e retonan cu bida riba un isla chikito ta trece cune.
Pa haci e informacion presenta mas accesibel na publico, Minister Maduro di Cultura ta invita comunidad pa sintonisa diadomingo awo 22 di mei pa 7 or di anochi atrabes di Diario TV Canal 48, caminda lo pasa e documentario aki un bes mas.
