google.com, pub-5639114718427035, DIRECT, f08c47fec0942fa0

Minister Xiomara Maduro ta presenta: Un Programa Special na television ‘Cera Conoci Cu RCC- Aruba’

Un grupo di artista cu a representa Aruba den un Festival di Circo Internacional na Hungria y a gana premio

 

Oranjestad – Minister Xiomara Maduro ta presenta un programa special na television pa cera conoci cu e Grupo di artista Ritmo Cubano Aruba (RCC-Aruba).

Esaki ta un grupo di acrobatistanan cu a representa Aruba na un competencia internacional di Circo ‘Budapest Circus Festival’ na Hungria, cu ta e di tres competencia internacional di Circo reconoci rond mundo. Na e Festival di Circo aki a participa circonan grandi y renombra di 29 pais, manera entre otro Rusia, Italia, Mexico, Spaña, Italia, Etiopia, Cuba y Ucraina.

E grupo RCC-Aruba a participa pa prome bes na e Festival di Circo internacional aki y a sali na tercer luga y a gana e premio di brons.  Ademas RCC-Aruba a gana e premio special. Esaki ta un premio cu ta wordo otorga na e grupo cu a gosa di mas admiracion di e publico.

Minister di Cultura ta brinda e programa aki pa asina comunidad di Aruba por presencia e show unico cu e Grupo di RCC-Aruba a presenta cune y asina logra gana e premio.

E programa ‘Cera Conoci cu RCC-Aruba’ lo pasa dialuna dia 23 di mei na TeleAruba pa 7’or di anochi y diamars dia 24 di mei na Diario TV pa 8’or di anochi.

Na nomber di Gobierno di Aruba y pueblo di Aruba, Minister Xiomara Maduro ta gradici RCC-Aruba pa e tremendo trabounan cu nan ta haci pa representa Aruba internacionalmente y laga nomber di Aruba resona tambe den e mundo di Circo.

Share this page to Telegram

This site uses Akismet to reduce spam. Learn how your comment data is processed.

%d bloggers like this: