Asosashon Tráfiko Sigur Kòrsou ta prekupá i ta alertá riba situashon peligroso. Seguridat di tráfiko ta importante si òf nò?

Willemstad- Asosashon Tráfiko Sigur Kòrsou a ripará un situashon hopi peligroso i e bosero di e asosashon señora Riglène Cristina kier alertá prinsiplamente peaton pa tene hopi kidou ku e situashon aki.
Riglène Cristina tin un par di dia ta tumando nota di un situashon sumamente peligroso riba “Emancipatie Boulevard Dominico F. “Don” Martina”. Ta asina ku tin un parada di bùs pega ku un kompania di seguro i na momentu ku un bùs baha un pasahero i e pasahero tin ku krusa kaya, e ta hañ’é ku un situashon bastante peligroso. E situashon aki nos ta sigui mira tambe dilanti Aqualectra i dilanti di Freezone. Tin un “midden berm” ku ta totalmente kubrí ku yerba basta haltu, pal’i wabi, matanan ku a bira grandi, asta tin un vangrail ku kasi no ta visibel, debí na tur e matanan ku ta krese na dje. Na varios okashon por a mira peaton tin ku bula over di e vangrail den tur e matanan ku tur konsekuensia ku esaki por trese ku né. Hasta ora krusa na e otro banda di kaminda na lado di Maduro Plaza tin un alsera ku ta kubri ku yerba basta haltu i ku personanan tin ku kana praktikamente riba kaya.

“Si ta bèrdat ku nos ta prekupá asina tantu ku seguridat den tráfiko, manera nos ta bisa, kon por ta ku tin un situashon di e indole aki,”Riglène Cristina ta sigui bisa. Peaton masha tempu ta forma un parti integral den tráfiko i bo ta mira ku tin algun kaminda a asta ahustá nos kayanan pa asina e peaton ta mas sigur den tráfiko i no por ta asina ku tin kaminda ta forma asina un peliger pa e peaton. Asosashon Tráfiko Sigr Kòrsou ta hasi un apelashon na e servisio di Obranan Públiko pa porfabor tira un bista riba e situashon aki i pa esaki wòrdú atendé muchu mas lihe pa nos evitá ku un peaton por resulta heridá i te asta fatal. Nos kier alertá e pasaheronan ku ta krusa kaya den e area aki, pa ta mas kouteloso na momentu di krusa kaya, i si tin ku krusa kaya, pa hasi mas uso posibel di e area na e lusnan di tráfiko, e area aki ta hasi krusamentu di  kaya un tiki  mas fasil, komo ku e ta menos shushi. 

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: