DISIPLINA KONSIENTE DEN SKOL

MINISTERIO KONSERNÍ ENSEÑANSA, SIENSIA, KULTURA & DEPORTE

 

DISIPLINA KONSIENTE DEN SKOL

PUBLIKÁ RIBA 24 MEI 2022

WILLEMSTAD – Ministerio di Enseñansa, Siensia, Kultura & Deporte a organisá un “Workshop Conscious Discipline®”. E workshop aki ta e promé paso den kuadro di preparashon integral di skolnan pa un mihó guia di alumno. E preparashon aki ta riba tereno di siñamentu sosial-emoshonal, disiplina i regulashon propio pa e alumno. E instruktornan sertifiká di Aruba Sra. Gina de Kort i  Sra. Vanessa Zara-Tromp a tene e seshon di dos dia pa un total di 16 kabes di skol di fundeshi i 6 eksperto den kuadro di maneho i guia den enseñansa.  E programa aki a keda introdusí na Aruba ya pa algun aña kaba i por mira e efektividat di e programa den e klasnan.

Disiplina Konsiente ta un programa efektivo basá riba eksperiensha pa krea un mihó ambiente den e klas dor di hasi uzo di konosementu riba tereno siñamentu sosial-emoshonal, disiplina i regulashon propio pa e alumno.  E programa aki ta basá riba un investigashon di e desaroyo selebral, informashon di desaroyo di mucha i práktikanan apropiá i efektivo. Ora praktiká esaki e ta trese kambio spesífikamente diseña den bida di hende en general. E programa aki ta brinda kabes di skol òf e maestro un hermèt pa traha riba e famia di skol di forma positivo kaminda e siensia di e desaroyo di e selebre ta e punto di salida. Dor di stimulá e desaroyo selebral por hiba e alumno den e direkshon adekuá  i asina e enseñansa por tuma lugá di un mihó manera. Skol mester ta manera un famia sano kaminda tur hende ta importante, tur hende tin balor, tur hende ta keda aseptá manera nan ta, pero tambe tur hende mester traha huntu, lokual finalmente ta hiba na kresementu personal di tur miembro di e famia ku yama skol. Pa mas informashon di e programa aki por bishitá e link aki: https://consciousdiscipline.com/.

Organisando i fasilitando e tipo di aktividatnan aki Ministerio di ESKD ta traha riba e preparashon integral di e alumno pa asina guianan di un mihó forma den e epoká moderno. Minister di Salubridat, Medio Ambiente & Naturalesa sra. Dorothy Pietersz-Janga den representashon di Minister di ESKD sr. Sithree van Heydoorn a hasi un yamada na e kabes di skolnan pa ban dirihí e kurpa mihó. Pues e kabes di skol tin un balor agregá grandi pa duna direkshon na su maestronan i konsekuentemente impulsa un desaroyo emoshonalmente sano serka su alumnonan. Minister D.Pietersz-Janga a yama e instruktonan di Aruba i e ministerio danki pa pone esfuerso den e trayekto aki. Tambe Minister a informá tur partisipante ku nan ta bai haña un sertifikado di forma virtual ku nan a partisipá na e “Workshop Conscious Discipline®”.

KOMUNIKASHON

** riba e potrèt athunto por tuma nota di e aktividat na GASPA Building na Nijlweg. Pa mas potrèt por bishitá na: Potrètnan Disiplina Konsiente

This site uses Akismet to reduce spam. Learn how your comment data is processed.

%d bloggers like this: