GOBIÈRNU TA INTRODUSÍ SISTEMA NOBO DI ATMINISTRASHON DI PERSONAL I SALARIO

MOTION – UN ERA NOBO DEN MANEHO, ATMINISTRASHON I SALARIO DI PERSONAL GOBIÈRNU DI KÒRSOU.
PRIVASIDAT DI DATOS DI PERSONAL TA GARANTISÁ.

WILLEMSTAD – Entrante 1 di aprel 2023, e atministrashon di Personal i Salario di Gobièrnu di Kòrsou a konosé un kambio teknológiko i ta den un bachi nobo ku yama MOTION. E proseso pa yega na e resultado aki a kuminsá na novèmber 2022 i a kulminá 31 di mart último durante di bishita di representantenan di Centric, ku ta e kompania desaroyadó di e software MOTION na Hulanda. Mayoria entidat públiko na Hulanda ta atministrá i manehá asuntunan di personal, salario, finansas i impuesto via e aplikashon di MOTION. E informashon di e aplikashon i di e database ta den un datacenter di Centric na Hulanda. E datacenter akí ta kumpli ku eksigenshanan rígido di Hulanda, Oropa i mundialmente. Pues esaki ta garantisá e privasidat i integridat di tur datos di personal.

E departamento di Personal i Salario di Gobièrnu di Kòrsou ta prosesá tur dato i pago di mas o ménos 7.000 empleadonan públiko ku ta laborá den tur ministerio, órganonan di estado, skolnan públiko, Marine, Wardakosta i penshonadonan.

Gobièrnu di Kòrsou ta trahando ku e kompania Centric for di 2016 i e aña akí a disidí di hasi un “upgrading” pa un vershon muchu mas modèrno i fásil pa personal di e departamento di Personal i Salario por prosesá datonan. Hefenan di servisio i empleadonan por hasi petishon akinan. E kambionan ta enserá ku e empleado públiko lo por hasi uso di e aplikashon riba kualke medio ku e tin na su disposishon, sea kòmpüter, laptop, tablet, telefòn di trabou òf privá basta ku e identifiká su mes korektamente den e sistema. E empleado awor tambe por yega i modifiká su informashon personal i haña akseso na su slep salarial i karchi di impuesto na e momentu ku e ta deseá.

Den e fase akí tambe lo kuminsá ku preparashon strukturá pa definí e proseso di evaluashon di empleadonan. E informashon akí lo ta base pa definí e posishon, karera i kompensashon di e empleado públiko. Pa seguridat di e sistema i pa garantisá privasidat di informashon di kada empleado, tur usuario di e sistema lo mester registrá un biaha di nobo ku un ‘password’ úniko. Tur empleado lo risibí un email den kurso di dia 3 di aprel ku e petishon pa nan registrá ku nan nòmber di usuario di trabou pa nan por kuminsá hasi uso di MOTION. Lo no por hasi uso di email privá òf ku no ta registrá den un dominio ku ta registrá serka Centric komo dominio ofisial di Gobièrnu di Kòrsou i su usuarionan.

Durante di e simannan benidero lo sigui ku e proseso pa implementá diferente módulonan di MOTION na e diferente ministerio i instanshanan pa kua ministerio di Maneho di Gobernashon, Planifikashon i Servisio Públiko ta prosesá informashon di personal i salario.

Minister di Maneho di Gobernashon, Planifikashon i Servisio Públiko, sr. Ornelio Martina, ta sumamente kontentu i satisfecho ku e logro akí pa asina yega na digitalisashon di nos sistemanan i hasi akseso na informashon mas lihé i konfiabel. Tur esaki pa tin informashon al dia i pa sirbi e ámtenar mihó.