Komunikado di Prensa: Monkeypox (2)

 



Willemstad – Ministerio di Salú, Medio Ambiente i Naturalesa ta informá tokante di e malesa di Monkeypox, kual tambe ta ser yamá “apenpokken”.

Monkeypox ta un malesa ku ta wòrdu kousá dor di un vírùs ku prinsipalmente ta manifestá su mes na e parti wèst i parti sentral di Afrika. Resientemente Organisashon Mundial di Salú (WHO) a informá ku a raportá diferente kaso di Monkeypox na Oropa i na Merka. Outoridatnan di salú ta investigando kon e malesa aki a plama su mes pa e dos kontinentenan aki i kua ta e gruponan den komunidat ku mas ta kore riesgo pa keda infektá. Sinembargo, informashonnan aktual ta mustra ku e variante ku ta sirkulando na Oropa no ta hopi kontagioso.

E síntomanan di Monkeypox ta paresido na esun di e malesa “pokken” òf sende paga. E malesa ta kuminsá hopi biaha ku e sigiente sintomanan:
●  Keintura;
●  Doló di kabes;
●  Doló di múskulo;
●  “lymfeklieren” hinchá;
●  Kalafrui;
●  Kansansio. 

Despues di 1 pa 3 dia ku e sintomanan aki manifestá, e persona ta haña un “uitslag” kual ta kuminsá den mayoria kaso na kara i ta ekspandé bai henter kurpa. E “uitslag” ta kuminsá komo un vlèk i despues e vlèknan ta bira bral. Despues ku e bralnan seka nan te keda 2 pa 3 siman pa despues e bralnan seku aki kai.

Servisio di Salú Públiko di Kòrsou (UO G&Gz, ántes GGD) ta keda monitòr e desaroyonan rondo di Monkeypox den estrecho koperashon ku instansianan lokal i internashonal. Aktualmente no a raportá ningun kaso di e malesa aki na Kòrsou.
Ku konstatá esaki e Servisionan konserní lo hasi tur e trámitenan nesesario pa kontené e vírùs aki mas tantu ku ta posibel.

Ministerio di Salú, Medio Ambiente i Naturalesa lo sigui mantené komunidat di Kòrsou informá. Pa kualke pregunta por tene kontakto ku dòkter di kas.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: