google.com, pub-5639114718427035, DIRECT, f08c47fec0942fa0

Prome Minister Evelyn Wever – Croes: Gobierno ta cla y no mester di uitstel: PROME MINISTER A INFORMA PARLAMENTO RIBA E STOPMENTO DI RECORTE DI 5% DI SALARIO Y DI E 12.6% NA 2023

 

“Hunto nos ta logra bienestar y progreso di nos comunidad”

 

Gobierno di Aruba, siman pasa a anuncia cu Aruba a yega na un areglo cu Hulanda pa paga bek e recorte di salario. Hulanda a pone algun condicion riba mesa. Prome Minister Evelyn Wever-Croes a indica cu Aruba mester cumpli cu e condicionnan ey y entrante juli di 2022 por paga e 5% na empleado publico y semi-publico y otro aña por elimina ful e 12.6%. “Esaki mi a anuncia caba y nos a papia di dje cu Secretario di Estado Alexandra van Huffelen y e tratamento lo a bay Rijksministerraad di awe mirando cu diabierna ta un dia liber na Hulanda”, Prome Minister a duna di conoce.

 

Minister Plenipotenciario na Hulanda señor Guilfred Besaril a informa Rijksministerraad cu Aruba ta acepta e condicionnan. Ya caba desde siman pasa Prome Minister a cuminsa traha riba esaki na unda a bin un poco mas detaye acerca. “No ta tur ta mes facil pa cumpli cu nan pero nos compromiso ta pa cumpli cu tur e condicionnan pa percura cu na juli tur trahado publico ta haya su 5% bek. Esaki Minister Plenipotenciario a informa nan tambe y ami a papia cu Secretario di Estado ayera extensamente riba esakinan y nos a yega na un acuerdo adicional na kico Aruba tin cu atene su mes y ki tempo”, Prome Minister a enfatisa.

 

Dialuna 23 di mei, Prome Minister a bay Parlamento tambe pa splica e situacion mirando cu dos di e condicionnan ta den nan area. No ta tur Parlamentario a aprecia esaki. “E parlamentarionan di MAS y e parlamentarionan femenino di AVP a haya cu ta un falta di respet cu mi a bay Parlamento cu esaki. Sra. Mervin Wyatt-Ras a puntra mi kico mi a bay haci eyden y si ta wega mi ta hunga pero ami a bay pa transparencia pasobra ta hopi importante mirando cu cada ciudadano di nos pais ta representa den Parlamento y e recorte di salario a causa hopi daño na nan”, Prome Minister a duna di conoce.

 

Parlamento a manda un carta pa Prome Minister na unda cu nan a informa cu nan lo duna tur di nan parti pa por cumpli cu e condicionnan pa asina Gobierno por duna empleadonan publico y semi-publico na juli e 5% bek y otro aña ful e 12.6%. Prome Minister a remarca tambe cu Gobierno ta purbando si por elimina e 12.6% completo pero den e presupuesto a tene cuenta cu 5%.

 

Minister Plenipotenciario na Hulanda a indica cu Gobierno no mester di uitstel y Aruba ta cla pa continua y cumpli cu nan. Corsou y St Maarten a pidi pa uitstel y pa pospone e decision aki pa asina nan minister tambe por papia cu Secretario di Estado van Huffelen. Sra. Van Huffelen diaranson ta na Corosu y diahuebs ta na Sint Maarten y e Premiernan no a haya chens pa papia cu ne prome cu e Conseho di Minister na Hulanda diaranson. Pa cua motibo tambe nan a pidi pa pospone.

 

“Aruba si a indica cu ta cla pe. Ademas ta condicionnan cu nos tin cu Hulanda pa nos por yega na stop e recorte mas lihe cu ta posibel. Nos a cuminsa cu tur e trabounan caba y nos lo percura di cla na tempo pa asina por duna tur hende nan placa bek. Hunto nos ta logra bienestar y progreso di nos comunidad”, Prome Minister Evelyn Wever-Croes a duna di conoce.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: