ENTREGA DI 5 PÈRMIT DI KONSTRUKSHON MAS NA SANDALS ROYAL CURAÇAO

MINISTERIO KONSERNÍ TRÁFIKO, TRANSPORTE I PLANIFIKASHON URBANO

 

Willemstad – Minister Tráfiko, Transporte i Planifikashon Urbano, Sr. Charles Cooper huntu ku Servisio pa Planifikashon Urbano (ROP) a hasi entrega di 5 pèrmit di konstrukshon mas korespondiente na e proyekto turístiko di impakto pa nos pais Kòrsou, esta Sandals Royal Curaçao. Esaki a tuma luga dia 30 di mei 2022.

 

Nos por a mira kon for di 2021 e proyekto aki a inisiá ku trabounan di konstrukshon i rekonstrukshon. Esaki kaminda ántes tabata Hyatt i despyes Santa Barbara Resort. Awor, konforme planifikashon di Sandals, e hotèl lo habri su portanan e siman aki. Ku e pèrmitnan di konstrukshon adishonal entregá áworaki, trabounan den e fasenan por sigui. Esaki ta un invershon promedio di mas o menos 65 mion US dòler.

 

Tambe, awor ku Sandals Royal Curaçao a risibí tur pèrmit di konstrukshon (8 na tur!) ta sigui ku e trámitenan na Ministerio di Desaroyo Ekonómiko pa asina risibí nan pèrmit di HORECA. Di e forma aki, nan ta finalmente kla pa habri nan portanan pa risibí turistanan tantu internashonal komo lokal.

 

Durante di tratamentu di e pèrmit di konstrukshon, diferente entidat di Gobièrnu a tene debido kuenta ku aspektonan importante manera, e parti di seguridat pa ku kandela, drenahe di awa pa ku e edifisio i tereno debí ku algun di e kamber lo ser situá riba laman na e parti sur na kosta di Pais Kòrsou.

 

Pa informashon general por tuma kontakto ku ROP via e number +5999433-3200. Tambe por manda Whats app na number di telefòn +5999511-8582 òf por manda e-mail na info.rop@gobiernu.cw.

           

 

https://www.facebook.com/profile.php?id=100045700818054

This site uses Akismet to reduce spam. Learn how your comment data is processed.

%d bloggers like this: