Minister Dangui Oduber Masha danki Sra. Brigida Croes pa e 50 añanan desplega den cuido medico na Aruba

ORANJESTAD – Diabierna atardi Minister di Turismo y Salud Publico Sr. Dangui Oduber tabata tin e placer di por ta presente na Dr. Horacio Oduber Hospital pa e celebracion di despedida di Sra. Brigida Croes. E tabata un atardi hopi ameno caminda a celebra e 50 añanan cu Sra. Croes a labora na nos hospital.
Sra. Croes a traha den enfermeria y a traha cu un total di 11 director di hospital durante su añanan di labor. E la comparti algun storia di con su trayectoria tabata. Sra. Croes a cuminsa traha na San Pedro. E la conta con enfermeria a evoluciona di e tempo ey te cu awor, sigur storianan hopi interesante pa tende.
Minister Dangui Oduber a expresa den nomber di Gobierno di Aruba e gratitude pa tur e esfuerzo y dedicacion cu sra.Croes a desplega na cuido medico y pashentnan di Aruba. Sra. Croes a demostra un dedicacion enorme, un pasion y compromiso pa cu su trabou durante 5 decada. Un dama hopi stima pa su coleganan. Danki pa e bunita añan cu bo a dedica na e comunidad medico y cu sra. Croes goza di un pensioen bon mereci.

 

 

This site uses Akismet to reduce spam. Learn how your comment data is processed.

%d bloggers like this: