PROME MINISTER A BISHITA KELDER DI ANGELITONAN RISHANDROH Y EUGENE DEN CUADRO DI DIA INTERNACIONAL DI MUCHANAN INOCENTE VICTIMA DI AGRESION
ORANJESTAD – Prome Minister Evelyn Wever – Croes tabata na santana na Zeewijk caminda e dos angelitonan Rishandroh y Eugene ta dera. A bishita e kelder conhuntamente cu colega Minister Rocco Tjon, Parlamentario Alvin Molina, famianan y sernan keri. Awe riba Dia Internacional di Muchanan Inocente Victima di Agresion, a tuma un momento pa recorda e susedido tristo aki cu lamentablemente a pasa na Aruba.
Nos muchanan ta wak nos como adulto pa nos protehanan, defendenan, stimanan y guianan. “E dos angelitonan aki a perde nan bida na un edad hopi chikito y den forma hopi cruel. Di e tempo ey caba. november 2017 a haci e compromiso cu ta bay percura pa algo asina no pasa mas,” Prome Minister a expresa.
Gabinete Wever-Croes 1 y 2 ta pone e ser humano central y pesey a traha riba e Sociaal Crisis Plan y awor ta trahando riba e “Family Justice Center”. Gabinete Wever-Croes a aloca mas di 30 miyon florin adicional pa e proyectonan aki.
Prome Minister Wever – Croes na e ocasion a haci apelacion na tur adulto pa ban duna nos muchanan e amor y cariño cu nan merece. “Abuso di mucha no ta algo cu nos por accepta. Hunto nos por para esaki y sali na defensa di nos muchanan.
Ohala e angelitonan sosega na pas y cu Dios duna e famia hopi forsa,” Prome Minister a termina bisando.
