google.com, pub-5639114718427035, DIRECT, f08c47fec0942fa0

Promé skol ku den su totalidat a bira miembro di Biblioteka Públiko Boneiru

06/06/2022

Biblioteka Públiko Boneiru ta yama bon biní na Kolegio San Luis Bertran komo e promé skol ku ofisialmente a bira miembro ku tur su alumnonan.

Ku e miembresia akí tur alumno di grupo 1 te ku grupo 8 di e skol na Rincon a risibí un tarheta di biblioteka ku nan por hasi uso grátis di dje. Biblioteka Públiko Boneiru ta spera di yama bon biní komo miembro na otro skolnan interesá tambe, pa sòru ku lesamentu di buki ta bira mas aksesibel pa nos muchanan. Di e manera akí Biblioteka Públiko Boneiru ta hasi esfuerso pa promové kultura di lesamenta serka nos muchanan na Boneiru.

E empleado di Biblioteka Públiko Boneiru Dorothy Cicilia a entregá e karchinan di miembresia ofisialmente na direktor di Kolegio San Luis Bertran señora Koeks i e kordinadó di idioma yùfrou Charlotte. Ku esaki a establesé un logro: pa promé biaha den historia di e biblioteka públiko na nos isla un skol kompleto a bira miembro ofisialmente. Biblioteka Públiko Boneiru ta spera ku mediante e logro akí nan ta bai kolaborá ku otro skolnan tambe i por ehèmpel ofresé alumnonan bou di 18 aña un miembresia grátis òf konhuntamente organisá aktividat di lesa pa mucha tende. Pa Biblioteka Públiko Boneiru promoshon di lesamentu di buki serka mucha ta para sentral den e aserkamentu akí.

Ku e kolaborashon akí e kantidat di miembro di Biblioteka Públiko Boneiru ta kresiendo rápidamente. Luna pasá e biblioteka a duna di konosé ku nan a yama bon biní na nan di 3800 miembro i awor akí ya kaba mas ku 1000 miembro a bini aserka. Personanan ku ta interesá ta bon biní pa forma parti di e kresementu akí i bira miembro tambe. Miembresia di Biblioteka Públiko Boneiru ta grátis pa mucha te 18 aña. Ku un miembresia por fia por ehèmpel 4 buki pa un periodo di 3 siman i tin un biblioteka digital tambe ku buki pa skucha disponibel. Pa mas informashon por yama 715 5344 òf por bishitá e biblioteka na Kaya Gramèl s/n.

Share this page to Telegram

This site uses Akismet to reduce spam. Learn how your comment data is processed.

%d bloggers like this: