Minister Pietersz- Janga a hasi entrega ofisial di fasilidat renobá na piskadónan di Playa Piskadó

Willemstad –  Resientemente Minister di Salubridat, Medio Ambiente i Naturalesa drs. Dorothy Pietersz- Janga a hasi entrega ofisial di un fasilidat ku a keda renobá na piskadónan di Playa Piskadó na Wèstpunt. Durante Minister su último bishita na e playa dia 4 di febrüari, piskadónan a mustra diferente punto di atenshon pa fasilitá nan trabou i benefisiá turista ku ta bishitá e playa pa mira turtuga i kultura di piskamentu na Kòrsou.

Na e okashon aki Ministerio di GMN a ampliá i drecha dak di e fasilidat kaminda piskadónan ta skama i kap piská. Minister Pietersz- Janga a bishitá Playa Piskadó pa tuma nota di e konstrukshon i hasi entrega ofisial na e piskadónan. Pronto lo pone un mesa mas di kap piská di manera ku piskadónan por sirbi nan klientenan mas rápido. Ministerio di GMN ta hasiendo trabounan pa mehorá fasilidatnan na diferente playa i haf di piskadó pa komunidat haña mihó servisio momentu di kumpra piská i pa hasi e sitionan mas atraktivo pa turista.