Tim di Krísis ta informá tokante efektonan di temblor na Venezuela

Willemstad – Djárason, 24 di yüni 2026, den oranan di atardi diferente persona na Kòrsou por a sinti efektonan di temblor, ku a resultá despues konforme informashon di Servisio Meteorológiko Kòrsou (Meteo) di ta un temblor magnitut 7.5 den serkania di kosta di Venezuela.

Un temblor por okashoná peliger pa tsunami i pa un momento breve a sospechá ku por tabatin un posibel menasa di tsunami. Esaki ta motibu tambe ku sierto paisnan den region a emití un atvertensia pa tsunami i despues di un ratu a kanselá e atvertensia. Den nos kaso, Meteo Kòrsou tambe a emetí un mensahe preliminar pa temblor, pa por a analisá i verifiká datos. Konsekutivamente Meteo a emetí un di dos boletin pa informá ku no tin menasa pa tsunami na Kòrsou.

Miembronan di ‘Crisisstaf’ a reuní ku Meteo pa haña un update di e situashon i posibel menasa pa Kòrsou. Meteo na su turno a indiká ku no tin menasa pa tsunami pa Kòrsou i ku ta sigui monitoriá eventual efektonan despues di temblor, esta ‘after-shocks’.

Aktualmente, Minister Shalten Hato, ta e mandatario enkargá ku krísis i kalamidat, i su persona a ser informá debidamente. Tim di krísis ta sigui monitoriá e situashon i lo informá komunidat mas aleu si esaki ta nesesario. Na nòmber di Gobièrnu di Kòrsou, ta manda palabranan di sosten i konbibí ku kada un ku a ser afektá di un manera òf otro i sigur na Venezuela.

Sigui kanalnan ofisial di Gobièrnu di Kòrsou i Servisio Meteorológiko Kòrsou pa tur informashon ofisial.

Residentenan di Kòrsou na Venezuela
Un petishon na tur residente di Kòrsou, ku aktualmente ta na Venezuela, pa registrá ‘online’ na embahada di Reino su ‘Informatieservice’ via: https://informatieservice.nederlandwereldwijd.nl

Informá famianan na Kòrsou di bo situashon i sigui informashon di outoridatnan lokal.
Si bo ta den un situashon di emergensia, por drenta den kontakto via WhatsApp ku embahada di Reino via: +31 857 737 400.