google.com, pub-5639114718427035, DIRECT, f08c47fec0942fa0

Partido PIN su aña di oposishon tabata eksitoso. Konsistensia, sentido di direkshon i forsa di argumento lo vense semper.

Willemstad — Ayera dieskuater di yüni gobièrnu Pisas II a yega un aña di gobernashon. Konsiderando e oposishon barbá ku espesialmente partido MFK a hiba, partido PIN i komunidat a ferwagt ku lo a para ketu na e fecha ku un lista largu i signifikante di logro. Sinembargo no a nota nada mas ku aki aya un simpel pabien riba retnan sosial,  kompañá ku e lamento usual refiriendo na e problemanan ku a bin topa komo si fuera ku nunka promé un gobièrnu a bin topa problema. 

Di otro banda, konsiderando kon komunidat i mundu polítiko ta pensa awe riba COHO, kanabis medisinal, prevenshon i ‘wellness’, Partido PIN por mira bek riba un aña di oposishon sumamente eksitoso.

 

Tempu ku dia

Ora lider di PIN sra. Camelia-Römer den pleno debate elektoral a insistí ku mester renegosha CHE, hopi a hasi mofa. Awe tur nanishi, inkluso esun di promé minister Pisas ku ke a pone Kòrsou lomba kant’i muraya, ta mustra den direkshon di renegosashon. Ora gobièrnu aktual i otro aktornan polítiko a dal pega na COHO paso supuestamente no tabata tin alternativa, awe parlamento di Kòrsou mes a usa e 8 argumentonan di Partido PIN i Suzy Römer pa argumentá Kòrsou su oposishon kontra COHO manera e ta  riba mesa.

 

E konsistensia bon fundá di Partido PIN ta riparabel tambe den e diskushonnan tokante kanabis medisinal. Kontrinkantenan polítiko miskiña a pinta e proyekto pretu, pero awe un parti grandi di komunidat korektamente ta insistí asina tantu riba e benefisionan ekonómiko, ku asta un delegashon di parlamento a tuma e inisiativa pa bai buska mas informashon.

Úniko lamento di PIN riba e punto aki ta ku e presidente di parlamento no ta asumí su posishon i yama e reunion pidí riba e tópiko, anto ku e minister di salubridat i agrikultura a skohe pa kita prioridat fo’i agrikultura. Di otro banda Partido PIN ta kontentu si ku sikiera awor den drivers seat e partido mas grandi di koalishon a mira e nesesidat di maneho di i invershon den ‘wellness’, esta prevenshon.

 

Ruta

Partido PIN ta pidi sr. Pisas i su tim pa hisa nan nivel di ambishon pa produsí maneho i benefisio riparabel pa komunidat en general i pa esnan mas vulnerabel en partikular, kuminsando na esnan desempleá,  famianan ku yu menor di edat, hende grandi ku entrada abou i nos hubentut. Ta den e áreanan aki por ferwagt ku Partido PIN lo bai dediká muchu mas atenshon den e tempu ku ta bin.

Share this page to Telegram

This site uses Akismet to reduce spam. Learn how your comment data is processed.

%d bloggers like this: