Premio Ekselensia, na memoria di  William “Junior” Millerson

 


 

Partido Alternativa Real (PAR) ta konmemorá 2 aña di fayesementu di William “Junior” Millerson. Dia 20 di yüni 2020, Junior a kumpli ku su tarea riba e mundu aki i el a bai laga un legado ekstraordinario na nivel personal i deportivo. 

 

Junior su hazañanan komo deportista ta impreshonante, tantu na nivel nashonal, komo internashonal. Den mundu di Karate i deporte en general Junior a alsa e nòmber di Kòrsou na un nivel haltu.  Motibu pa kual Junior ta miembro di “Hall of Fame” ku ta e honor máksimo pa un deportista òf dirigente deportivo na Kòrsou.

 

Komo presidente di Parlamento di Kòrsou i komo Parlamentario el a duna su aporte te na final. Su palabranan den e último reunion di parlamento ku el a asistí, 

“Te na final”. Te na final, ta un refleho di Junior su aktitut kompetitivo, komo ‘team player’, komo profeshonal i komo sirbidó; Junior semper a lucha te na final i tei pa bo te na final.

 

Pa su legado i e persona dediká ku Junior tabata, partido PAR semper lo karga Junior den nos memoria komo miembro, amigu i ehèmpel. E último dos aña na tur momento ta rekordá un palabra di Junior òf algu ku a pasa huntu kuné ku ta pone un smail riba nos kara òf ta inspirá nos. 

 

PAR su deseo ta ku mas hende por wòrdu toka i inspirá dor di e legado di Junior i na su honor PAR ta instituí e premio “ Ekselensia”. E premio aki lo ta dediká na Junior su bida. 

 

E premio lo keda otorgá anualmente, na hóbennan ku a destaká riba tereno di deporte, tereno akadémiko i servisio na komunidat.  Tur aña e premio lo keda entregá riba e fecha di nasementu di Junior, 10 di yanüari.  E promé edishon di e premio “Ekselensia” lo ta na yanüari, 2023

 

PAR lo forma un komishon di eksperto i miembronan ku lo hasi e evaluashon i na final hasi e eskoho di e premiadonan.  Junior semper a kere den ekselensia i komo partido nos lo sigui karga e legado di nos miembro i amigu William “ Junior” Millerson. 

Share this page to Telegram

This site uses Akismet to reduce spam. Learn how your comment data is processed.

%d bloggers like this: