MESTER BINI SOLUSHON PA FUNSHONAMENTU DI MINISTERIO DI DESAROYO SOSIAL
Problema di edifisio ta afekta servisio na pueblo
Pa basta tempu kaba tin un situashon na e edifisio di WTC kaminda e ministerio di Desaroyo Sosial, Labor i Bienestar (DSLB) ta ubiká. E situashon a trese kuné ku tur empleado ta na kas aktualmente i no por funshoná. Esaki ta trese kuné ku pueblo no por risibí e servisio ku ta spera di e ministerio.
Banda di esaki nos a bin komprondé ku ningun persona no por tin kontakto ku kasnan di bario pa motibu ku nan no tin konekshon di telefòn. Pues ku e telefònnan ta deskonektá.
Nos a drenta e di 3 siman den kual e situashon aki tei,i práktikamente e situashon a keda meskos. E edifisio no ta adekuá pa funshoná i te ainda no tin kambionan ku a duna resultado di mehorashon di e situashon. Despues di e fenomeno tropikal ku nos a konose e edifisio a bira pio pa funshoná. Frakshon di MAN ta dirigí algun pregunta na Minister, mirando ku tin diferente persona i tambe trahadó ta bati na nos porta ku nan preokupashon pa e situashon di e edifisio i tambe no funshonamentu di e ministerio.
Konforme artíkulo 96 di Reglamento di Órden di Parlamento nos aha si e siguiente pregunta na Minister
1. Minister ta na altura di e situashon i problemanan rondó di e edifisio di Ministerio DSLB?
2. Promé ku a tuma e desishon di drenta den e edifisio di WTC,no a laga hasi inspekshon di e edifisio?
3. Ki ta Minister su akshon konkreto pa remediá e situashon i pone e ministerio bèk den funshon?
4. Den ki término e situashon di e edifisio ta remediá?
5. Ministerio di DSLB ta esun ku lo karga e gastunan pa remediá e situashon di edifisio?
6. Kon pueblo por haña servisio/yudansa di ministerio DSLB aktualmente?
7. E situashon di telefòn na Kas di Bario a keda solushoná?
Nos ta spera ku mas ku pronto posibel e situashon keda remediá pero tambe ku e ministerio ta den funshon optimal pa duna e servisio ku pueblo ta spera. DSLB ta un ministerio importante pa duna sosten na nos hendenan i no por ta asina ku e ta desfunshonal pa motibu di edifisio.