Pronto trabounan di inspekshon i reparashon den área di Sapaté i Abrahamsz AQUALECTRA TA KONTINUÁ  INSTALÁ METERNAN INTELIGENTE AWOR  DEN ÁREA DI DOMI I OTROBANDA

Willemstad 3 di  yüli 2022– Despues di un periodo di prueba i evaluashon interno, Aqualectra ta kla pa sigui ku e trayekto pa instalá meternan inteligente na Kòrsou. Durante e promé siman di yüli 2022 e tim di proyekto AMI (Advance Metering Infrastructure) lo hasi trabou di inspekshon den área di Domi i Otrobanda. Un tim di kontratista bon identifiká, kompañá pa empleadonan di Aqualectra, lo pasa di kas pa kas pa revisá i prepará e área kaminda ku lo kita e meter bieu i despues instalá e meter inteligente. Meta di e inspekshon ta pa detektá posibel trabounan di reparashon ku mester hasi promé ku instalá e meter inteligente. Durante luna di yüli i e promé siman di ougùstùs ta hasi inspekshon i tambe e trabounan di reparashon ku a keda detektá durante inspekshon. Pronto Aqualectra ta kuminsa ku trabounan di inspekshon i reparashon den área di Sapaté i Abrahamsz tambe. Aqualectra ta pidi diskulpa pa posibel molèster den suministro di awa òf koriente debí na e trabounan di reparashon den e áreanan menshoná.

 

Durante e último kuartal di aña 2021 Aqualectra a inisiá e promé fase di e proyekto AMI, kual tabata konsistí di remplaso di meternan di distribushon konvenshonal di tantu di awa i koriente pa meternan digital inteligente. Despues di a kambia meternan den área di Abrahamsz i Sapaté te ku desèmber 2021, e tim di AMI a habri aña 2022 ku un evaluashon interno pa adaptá i mehorá e proseso di kambio di meter. Un di e motibunan prinsipal dikon mester a adaptá e proseso ta debi ku tin skarsedat di meter inteligente di koriente rònt mundu. Debí na COVID-19, no por a produsí algun komponente elektróniko pa e meternan. Esaki ta nifiká ku Aqualectra lo mester kambia ménos meter inteligente di koriente pa aña 2022. 

 

Sinembargo, Aqualectra lo uza e meternan inteligente ku tin disponibel aktualmente pa kontinuá ku e trabounan pa kambiá meter inteligente den sierto áreanan na Kòrsou. Un tim uniformá i bon identifiká ta pasa inspekshoná e situashon di meternan na kasnan i tambe e trabounan di reparashon. Lo publiká aviso den medionan di komunikashon i via e página di Facebook Aqualectra Utilities pa indiká den kua área e trabounan ta tuma lugá. Alabes ta notifiká e klientenan konserní di e trabounan ku ta bai tuma lugá dor di laga tur informashon relevante den e kliente su ‘brievenbus’. Ta rekomendá pa keda vigilá kontenido di e ‘brievenbus’ na kas ku regularidat pa keda bon informá. Kaminda e meter ta riba tereno òf na propiedat di e habitante Aqualectra lo traha un sita pa pasa. 

Ta importante pa koperá ku Aqualectra pa asina e operashon por kana den un paso aselerá i korekto. Aqualectra ta gradisí su klientenan pa koperá pa asina huntu nos krea e ret di utilidat di futuro di Kòrsou.

Share this page to Telegram

This site uses Akismet to reduce spam. Learn how your comment data is processed.

%d bloggers like this: