Prome Minister Evelyn Wever-Croes:  PROME MINISTER TA FELICITA GRADUADONAN DI EPI SECTOR ‘ZORG EN WELZIJN’

Prome Minister Evelyn Wever-Croes: 

PROME MINISTER TA FELICITA GRADUADONAN DI EPI SECTOR ‘ZORG EN WELZIJN’

ORANJESTAD – E Siman aki Prome Minister Evelyn Wever – Croes tabata presente na diferente ceremonia di graduacion. Recientemente e studiantenan di EPI di Sector ‘Zorg en Welzijn’ a ricibi nan diploma. Prome Minister a expresa cu e ta un honor pa representa Gobierno na e ocasion

 

“Sea orguyoso di bo mes, ami ta hopi orguyoso di boso,” Prome Minister a inicia bisando. Cu e logro aki, cada graduado ta formando nan futuro y futuro di Aruba. E profesion di brinda servicio esta, ‘zorg en welzijn’ ta un bunita profesion. Y awor cada graduado ta drenta otro etapa den bida sea ta pa traha of sigui studia, pa cual Prome Minister a enfatisa riba e importancia pa no laga nada kita nan for di nan meta.

 

Premier Wever – Croes durante su speech a referi na Minister Endy Croes cu ta enfatisa riba e  4 D-nan: Deseo, Disciplina, Dedicacion y Determinacion y con pa aplica esakinan. Fiha bo deseo/bo meta. Aplica disciplina, keda traha duro riba dje. Mustra dedicacion na yega bo meta, bo estudio of bo trabou. Y no laga nada strobe bo, pasobra cu determinacion bo ta logra.

 

Den nomber di Gobierno di Aruba Premier Wever – Croes a gradici henter e staff y personal di docentenan cu ta esnan cu a guia cada un studiante pa yega na e exito aki. Y a duna danki tambe na mayornan y demas famianan cu tambe a brinda sosten y a kere den e studiantenan.

Pa conlcui, Prome Minister a bisa cu Aruba ta saliendo di e pandemia, y ta temponan cu ainda tin retonan hopi dificil, pero lo sigui traha na recuperacion di nos pais. Aruba mester di nos tur! Masha pabien na tur graduado y hopi exito den futuro.