Ministerio di Enseñansa, Siensia, Kultura i Deporte NO ta bai muda pa edifisio di Wimco

WILLEMSTAD – Den Extra di 18 yüli 2022, por a tuma nota, ku a publiká ku Ministerio di Enseñansa, Siensia, Kultura i Deporte (ESKD) ta bai muda e siman aki pa edifisio di Wimco. Pa medio di e komunikado aki Minister di ESKD sr. Sithree van Heydoorn ta informá ku e informashon aki no ta kuadra ku bèrdat.

A hasi un bishita na e edifisio di Wimco pa tuma nota di e estado di e edifisio i djabièrnè 15 yüli 2022, propietario di Wimco a duna un presentashon di kon nan por transformá e edifisio den unu, ku ta sirbi e nesesidatnan di ministerio di ESKD. Durante di e reunion aki a informá e doñonan di Wimco di e kuadro di lei i proseduranan ku komo Ministerio di ESKD, nos mester tene kuenta i kumpli kuné relashoná ku lei di kompatibilidat ora hür un lokalidat.

Na e momentu aki no tin ningun palabrashon formal ku Wimco ta e edifisio kaminda Ministerio di ESKD lo keda ubiká. Tampoko no tin ningun planifikashon di mudansa.

Si, Minister Sithree van Heydoorn tin e deseo, pa tur su servisionan ta ubiká den un solo edifisio, pero nos ta kana e kaminda aki transparente i konforme nos leinan di komptabilidat.

Nos ta lamentá ku Extra no a verifiká e informashon ku Ministerio di ESKD, promé ku a publiká esaki.

—

Sr. Sithree van Heydoorn

Minister di Enseñansa, Siensia, Kultura i Deporte