GOBIÈRNU TA DUNA REKONOSEMENTU NA HÓBEN ELTEN BART

WILLEMSTAD –  Riba petishon di Minister di Enseñansa, Siensia, Kultura i Deporte (ESKD) sr. Sithree van Heydoorn, konseho di Minister a invitá e hóben pintor Elten Bart bin di bishita na Fòrtí. Gobièrnu den su totalidat a risibí e hóben huntu ku su mayornan sr. Elton i sra. Magnolia Bart i dosente sra. Niñosoties (Nina) Nivillac den Sala Multi-funshonal Jerry Lasten ku un bunita sorpresa pa e alumno. Tambe e hóben Jaër Thompson a kompaña e hóben Elten Bart na e bishita pa traha un produkshon di e aktividat kompletu. Tur esaki ta den kuadro pa pone atenshon na nos mes hendenan ku tin talento i stimulá e desaroyo di nan arte.

Elten Bart (9 aña) i Jaër Thompson (13 aña) ta alumnonan di skol di Fundeshi Fatima College ku ta bou di Direktiva di Skolnan Katóliko. E direktor di e skol Norval (Payo) Faneyte huntu ku e maestro Niñosoties (Nina) Nivillac ta krea oportunidat i duna e hóbennan chèns pa nan desaroyá nan talento. Resientemente Elten Bart bou di guia di su maestro a tene eksposishon di su pinturanan. Esaki a keda promové riba medionan sosial i a kapta atenshon di Minister di Enseñansa, Siensia, Kultura i Deporte sr. Sithree van Heydoorn. P’esei Minister van Heydoorn a aserká su kolega ministernan pa huntu regalá e hoben un mesa speshal pa ku e arte di pintamentu. Komo muestra di apresio e Hóben Elten Bart tambe a hasi entrega na Minister di ESKD sr. S. van Heydoorn, su promé pintura riba kanvas usando ferf.

Tambe e hóben Jaër Thompson a set up su material i graba henter e aktividat pa traha un produkshon den forma di video di e bishita. E hóben Thompson aki tin vários talento manera saka potrèt, filma, editá, saka potrèt i tambe animá den e mundu di entertainment manera maestro di seremonia i DJ. Alabes e hóbennan a haña oportunidat pa bishitá e sala di Produkshon di Gobièrnu i sera konosí ku koleganan ku ta traha den e ramo aki.

Gabinete Pisas ta sigui stimulá nos suidadanonan i partikularmente nos hóbennan pa nan sigui desaroyá nan talento i logra nan máksimo potensial den komunidat.

—

KOMUNIKASHON

**riba e potrètnan athunto por tuma nota di e bishita i momentu ku Konseho di Minister ta hasi entrega di e regalu