Minister Xiomara Maduro tabata presente na e inauguracion di e exposicion ’50 years of perpetual light’

‘Cada potret ta conta un storia’

Minister Xiomara Maduro tabata presente na e inauguracion di e exposicion ’50 years of perpetual light’

Celebrando Rob Vermeer su 50 aña documentando e historia di nos Pais atraves di fotografia

 

Ken no a yega di bishita Checkpoint Color, e prome negoshi di fotografia aki na Aruba na final di Caya Betico Croes? Checkpoint Color ta e cas di potret cu a bin ta sirbi nos comunidad pa 50 aña. Grandi y chikito a yega di bishit’e pa nan potret oficial pa sea paspoort, cedula di identidad of rijbewijs, pero tambe pa documenta momentonan special den bida manera bautismo, ricibimento, graduacion of mas. Checkpoint Color durante su 50 aña di existencia a yuda hopi di nos pa conserva parti di nos memoria di nos famia y di nos Pais. Pa conmemora e bunita trayectoria aki, Checkpoint Color a organisa un exposicion, e 50 aña di luz perpetuo.

 

A toca Minister Xiomara Maduro e honor, pa hunto cu colega Ministernan Croes, pa ta presente na e inauguracion oficial di e exposicion di Rob Vermeer titula ’50 years of perpetual light’. Un exposicion sin igual caminda cu por admira potretnan di personahenan importante den nos comunidad, di farandula caribeño y diferente paisahe di nos isla. Asina tambe tin un coleccion unico di nos Libertador Gilberto François ‘Betico’ Croes. Tambe por admira diferente personahe den nos comunidad, hopi cu ta na bida ainda, pero otronan cu no tey mas y cu hustamente atraves di e exposicion aki a bolbe haya un bida treciendo recuerdonan unico y memorabel di nan.

 

Durante e inauguracion aki, Minister Maduro a hiba palabra, gradiciendo sr. Rob Vermeer pa su 50 aña documentando e historia di nos Pais y tambe gradiciendo e pa su servicio na nos comunidad. Pa e ocasion aki, Minister Maduro a entrega sr. Rob Vermeer un muestra di aprecio pa e bunita trabou aki. Minister Maduro ta felicita sr. Rob Vermeer, su señora Marjorie, yiunan Fernando y Cher y demas famia, y tambe e empleadonan di Checkpoint Color cu e bunita exposicion aki. Minister Maduro ta extende un invitacion na Pueblo pa pasa admira e exposicion na Checkpoint Color cu ta parti di e memoria di nos Pais. Cada potret ta conta un storia.

This site uses Akismet to reduce spam. Learn how your comment data is processed.

%d bloggers like this: