Minister Pietersz- Janga ta mustra ku Ministerio di GMN tambe lo aktua kontra esnan responsabel pa destrukshon na kosta di Kòrsou

Minister Pietersz- Janga ta mustra ku Ministerio di GMN tambe lo aktua kontra esnan responsabel pa destrukshon na kosta di Kòrsou


Willemstad – Resientemente Kòrsou a keda sorprendí pa dos kaso di violashon di nos naturalesa, paisahe marino i kosta ku a tuma lugá durante trabounan di konstrukshon. Ministerio di GMN den kolaborashon ku Ministerio di VVRP lo analisá kada situashon apart. Den kaso di Pietermaai Ministerio di GMN eventualmente lo laga Carmabi duna konseho kiko ta e posibel daño na e ekosistema marino. Basá riba esaki ta tuma medidanan kontra esnan responsabel pa e akto ilegal aki. Pa loke ta trata kaso Jeremi, Ministerio di GMN den mesun koperashon ku Ministerio di VVRP i tambe APC (komo ta trata aki di tereno privá) lo investigá e daño na naturalesa i buska konseho pa wak kon mas tantu posibel por restorá e daño na e terasa di kalki.

Pietermaai

Den e kaso di Pietermaai Ministerio di VVRP a duna pèrmit pa drecha pida kosta ku a sufri daño di diferente mal tempu den transkurso di añanan, pero a hasi otro kos ku e pèrmit ku a keda otorgá. Komo ku e situashon na Pietermaai ta trata di dèmpelmentu di laman, no tin bista eksakto kiko e daño real lo por ta. Den e kaso aki lo pidi Carmabi pa hasi un investigashon i duna konseho formulá den un rapòrt di e daño ku a keda okashoná pa mira ku e rif di koral a sufri daño òf lo por sufri daño den futuro. Ku transkurso di tempu lokual a keda konstrui por forma peliger pa e rif di koral momentu ku presenta un mal tempu ku ta destruí e trabounan di dempelmentu i hala e tera i piedranan bai kune i tapa parti di e área di koral ku ta mas leu den laman. Klaramente a destrui tambe e struktura natural di e kosta pa pone un pida kosta artifisial.

Jeremí

Na Jeremi por mira klaramente destrukshon di e teras di kalki ku tin alo largo di e kosta. E terasa di kalki aki a forma su mes bou di laman alrededor di 1 mion aña pasá i ta formá pa skelèt di miones di koralnan chikitu ku hopi aña pasá tabata forma parti di un rif di koral bou di laman.
Riba e teras aki tin vegetashon ku ta keda chikitu komo ku e suela di ta kalki duru ku hopi buraku i porio ku ta laga awa pasa rápido bai abou. Lo no tin hopi organismo grandi ta biba riba òf den e pida ku a keda destruí. Pero e burakunan i porionan ta forma sigur un lugá di biba i skonde pa kangreunan, reptielnan i otro organismonan chikitu. Hopi lamentabel ta e destrukshon di e bunita struktura natural di e kosta di terasa ku di su mes, nunka mas lo drecha. Lo por restorá esaki bèk door di yena e parti ku a kita afó i trata na igualá e muraya natural di kalki pero pa semper lo keda mira sikatris di e daño ku a keda kousá na e paisahe di kosta di kalki ku a keda destruí.

Share this page to Telegram

This site uses Akismet to reduce spam. Learn how your comment data is processed.

%d bloggers like this: