Pa lei aktonan di vandalismo ta kastigabel AQUALECTRA TA LAMENTÁ KU DESKONOSÍNAN A VANDALISÁ METERNAN INTELIGENTE DI AWA DEN NANIESTRAAT

Willemstad 12 di ougùstùs  2022- Resientemente Aqualectra a duna kontinuashon na trabounan pa instalá e ret di meter inteligente na Kòrsou komo parti di su esfuerso pa inová operashon i krea e ret di awa i koriente di futuro. E tim di AMI (Advanced Metering Infrastructure) a bin ta hasi trabounan di inspekshon i tambe a kuminsá instalá e meternan inteligente di awa den e área di Domi i Otrobanda. Aqualectra a konstatá djabièrnè mainta e situashon lamentabel kaminda deskonosínan a vandalisá algun meter inteligente di awa ku a keda instalá den Naniestraat. Aqualectra ta lamentá e tipo di aktonan di vandalismo aki. Aqualectra ke spièrta komunidat riba e echo ku e tipo di aktonan aki ta kastigabel pa lei. Ademas, e tipo di aktonan aki ta tacha e meta prinsipal di e proyekto di AMI, esta pa duna nos klientenan un mihó servisio di suministrashon di awa i koriente. Aqualectra a inisiá un investigashon pa identifiká esnan responsabel pa e akto di vandalismo aki. Mas ku klaro lo responsabilisá e personanan konserní pa nan aktonan.

Tabata habitantenan atento ku a tuma nota di e situashon i a notifiká Aqualectra mesora. Na yegada por a nota ku malechornan a mishi ku 6 meter inteligente di awa, di kua 2 di e meternan aki a lòs i kousa basta desperdisio di awa. Por lo pronto lo sigui ku e trabounan aki den e área te ku luna di novèmber 2022. 

E proyekto pa instalá meternan inteligente na kas i negoshi ta un proyekto di mas aña ku ta konta ku un invershon di 151 mion florin. Aqualectra ke pidi komunidat pa sigui ta atento i yuda sosten’é e proyekto te kaminda ta posibel, pa asina huntu nos sigui desaroyá nos pais.