Exitoso programa di vakantie di MANA

 

MANA (Museo Arqueologico Nacional Aruba) su programacion di vakantie grandi e aña aki tabata diferente y exitoso.  MANA a ofrece un programa den aire liber na convento di Imeldahof unda e exposicion temporario “Lasonan Caribense, hende conecta antes y awor” ta ubica.

Durante e simannan di vakantie cu a pasa, a ricibi 4 grupo di “kamp” na Noord. Cada un a participa den un programa di mas o menos 2 ora unda e muchanan a siña di nos herencia comparti cu Caribe.

Na mes localidad MANA a ofrece durante tres mainta pa muchanan e actividad “Tras rastro di Indjan den Caribe”.  Nan a siña tocante e historia y forma di biba di Indjannan den Caribe.  Cu e informacion aki, nan a expresa con Indjannan tabata biba, cosecha, rondia, nabega y intercambia material y cuminda.  Alavez nan a experencia parti di trabou di arkeologo, esta seftamento. Na fin cada participante a traha  un hanger di “Delfts blauw”, un di e materialnan cu e Europeonan a trece Caribe den e epoca historico.

Den museo na Playa, MANA y Parke Nacional Aruba a ofrece dos merdia cu actividad den cuadra di e iniciativa “Buki di pret”. E tema tabata ‘Bats @ the Museum’. E Parkrangers a comparti informacion di e raton di anochi, cu enfasis riba su funccion den nos naturalesa.  Durante un guia tematico den salanan di exposicion permanente, e muchanan y algun mayor a haya un bista di e rol di e raton di anochi den e cultura di e Indjannan di Aruba. Nan a hunga un wega siñando loke ta ‘eco-location’ cu e raton di anochi ta usa pa jaag riba insectonan. Finalmente e participantenan a relaha trahando un raton di anochi di pom poms.

Un 150 mucha a disfruta di ful e programacion di vakantie di MANA. Banda di e participacion na e actividadnan special pa vakantie, e exposicion permanente di MANA den Schelpstraat 42 na Playa, tambe a atrae grandi y chikito. Diferente camp, grupo di mucha y famia a probecha pa bishita esaki. Aunke trabou di mantencion ta andando riba Compleho Ecury por sigui bishita MANA. E entrada ta ubica den e edificio di glas na banda di e parkeo. E exposicion permanente y hardinnan di MANA ta habri di dialuna te diabierna entre 9 am y 5 pm y entrada ta gratis!

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: