Minister Dangui Oduber JETBLUE TA ANUNCIA CAMBIO OPERACIONAL PA 2023



ORANJESTAD – Minister di Turismo Sr. Dangui Oduber ta informa pueblo di Aruba cu a ricibi noticia for di Aruba Airport Authority (AAA) cu e aeroliña mericano JetBlue Airways a anuncia cu entrante 4 di januari 2023 no lo tin vuelo directo mas entre Aruba y Fort Lauderdale como tambe entre Aruba y Newark. E aeroliña a haci un anuncio caminda cu nan a indica cu lo stop por lo menos 37 ruta cu destinacion pa Caribe pa aña 2023. Entre e rutanan aki, Newark y Ft Lauderdale pa Aruba tambe ta menciona.

Ta importante pa enfatisa cu e decision aki no ta un refleho di e mercado mericano di turismo pa cu Aruba. Al contrario JetBlue tabata tin un crecemento di 3% den aña 2022 compara cu aña 2019, no obstante dificultad nan di e pandemia.

Durante e ultimo lunanan JetBlue a haña nan mes cu hopi contratiempo operacional. Segun e aeroliña, e decision aki a wordo tuma pa asina nan por brinda un miho servicio y calidad na tur pasahero cu e capacidad operacional cu nan tin na e momentonan aki.

Pero tambe mester bisa cu na mes momento JetBlue a anuncia cu nan lo aumenta e vuelonan entre Aruba cu New York y tambe vuelonan entre Aruba cu Boston, pues esaki ta crea un balans den e “capacity gap”. E asientonan di vuelo cu Aruba ta perde di e dos destinacionnan cu ta Ft Lauderdale y Neward, ta wordo yena door di vuelonan cu lo aumenta desde New York y Boston. Actualmente tin 25 vuelo entre Aruba cu New York y 15 vuelo entre Aruba cu Boston pa siman.

 

Minister Dangui Oduber di su banda ta sigura pueblo di Aruba cu e team di Aruba cu ta encarga pa habri rutanan nobo lo sigui traha ariba esaki pa nos por avansa hunto como pais y yega bek na recuperashon completo di nos turismo.

Share this page to Telegram

This site uses Akismet to reduce spam. Learn how your comment data is processed.

%d bloggers like this: