Vise Presidente ta risibí petishon ku suidadano Julius Koko a entrega na Parlamento

Fuente sra. Gisélle Mc William: Vise Presidente ta risibí petishon ku suidadano Julius Koko a entrega na Parlamento

Djabièrnè dia 17 di mei 2019 E Vise Presidente di Parlamento sra. Gisélle Mc William huntu ku su kolega di frakshon sr. Wimbert Hato i e Grefir di Parlamento mr. Silvin Cijntje a risibí e suidadano sr. Julius Koko i un grupo basta grandi di persona ku ta sostené e inisiativa pa kual nan a entrega ofishalmente un karta di petishon na Parlamento. E inisiativa di e suidadanonan aki ta pa nos pueblo kuminsá selebrá e fecha 1 di yüli ku ta konmemorá e Abolisashon di Sklabitut na 1863. Na Hulanda i Sürnam tur aña ta selebrá e gran momentu di Emansipashon di esnan ku a ser Sklabisá komo “ Keti Koti” ( Deskadená dje Pueblo). Segun señor Julius Koko e selebrashon di dia di Abolisashon di Katibunan di 1 di yüli 1863 aki ta bai enrikesé Kòrsou su pueblo su sentido di orguyo pa ku su historia i kultura Nashonal.
Alabes nan presenta un idea pa por aloká un estatua die Heroe Nashonal Tula na entrada di Willemstad, esta riba Hendrikplein.