Minister di Cultura Xiomara Maduro – Homenahe na Etty Toppenberg: Etty stima Pais Aruba y su bario di Companashi

Etty stima su bario Companashi, e bario cu a mire nace, crece y desaroya su mes como un di e talentonan musical  grandi di nos Pais. Etty ta masha orguyoso di su bario, Companashi4ever y cu orguyo Etty ta skirbi riba su pagina di facebook cu Companashi e bario mas chikito di Aruba cu a ricibi mas medaya di merito di Cas Real. 

Como artista di nos Pais Aruba, Etty a gana cariño y aprecio di nos tur. Su trayectoria den mundo di musica ta impresionante. Etty ta bay den historia como prome cantante Arubiano cu a presenta nos Himno Nacional, Aruba Dushi Tera’ den e ceremonia inaugural di nos Status Aparte, na momento cu Aruba a bira Pais, net despues di 12’or di marduga dia 1 di januari 1986.

Etty hunto cu su amigonan Eric Escalona y Max Hassel a forma e popular ‘Trio Huasteca’ y hunto cu e Trio aki, Etty a pone su bos y Aruba su nomber resona dos biaha den e prestigioso Festival OTI de la Cancion, un logro cu te awe Pais Aruba ta hopi orguyoso di dje.

Etty y Trio Huasteca tabata un di e pioneronan den turismo, cu a traha hopi duro pa promove Aruba den exterior. Tambe Trio Huasteca tabata ricibi hopi invitacion tanto local como internacional pa deleita publico cu nan cancionnan y musica. Asina Etty a representa nos Pais Aruba varios biaha den exterior, cantando y entreteniendo y na mes momento promove nos dushi Pais.