Pa e siman di seguridat den tráfiko, Asosashon Tráfiko Sigur Kòrsou ta spera ku awor si por ofisialisá e plataforma di seguridat den tráfiko

Pa e siman di seguridat den tráfiko, Asosashon Tráfiko Sigur Kòrsou ta spera ku awor si por
ofisialisá e plataforma di seguridat den tráfiko.
Willemstad- Riglène Cristina di Asosashon Tráfiko Sigur Kòrsou ta kontentu manera tur aña ku ta
dediká un tiki atenshon na Seguridat den Tráfiko den e di 3 siman di ougùstus. Pero Asosashon
di Tráfiko Sigur Kòrsou su petishon ta pa no duna atenshon den e di 3 siman di ougùstus so,
pero dediká na seguridat di tráfiko henter aña.
Ta asina ku Nashonnan Uní a proklama 2011 pa 2020 komo dekada di akshon pa seguridat
den tráfiko, ku e meta pa salba mas ku 5 mion bida mundialmente ku lo bira viktima den tráfiko.
Debi na esaki, parlamentu di Kòrsou a bai di akuerdo ku un moshon día 31 di mei 2011,
kaminda Parlamentu ta urgi gobièrnu pa den kuadro di e “Dekada di akshon pa seguridat den
tráfiko” pa entrega un plan di mas aña pa oumentá e seguridat den tráfiko.
Ku e meta ei na febrüari 2015 pa medio di un “landsbesluit” lo a instituí un plataforma ku lo
kordiná seguridat den tráfiko. E plataforma aki lo tabatin komo meta pa hasi investigashon i
implementashon di medidanan pa asina garantisá un nivel haltu di seguridat den tráfiko.
E plataforma aki ta konsistí di entre otro gruponan di trabou, organisashonnan ku ta kai bou di
gobièrnu i e 5 ministerionan ku ta VVRP, GMN, BPD, Hustisia i OWCS.
E responsabilidat di e plataforma aki ta pa prinsipalmente pa desaroyá un plan stratégiko
amplio tokante seguridat den tráfiko pa aña 2016 – 2030. Asosashon di Tráfiko Sigur Kòrsou
kier sa, si e gobièrnu aktual ta na altura di e “Landsbesluit” aki, i si ta si “Pa cuando”? señora
Cristina ta sigui bisa.
“Señora Riglène Cristina ta enfatisá ku awe ya nos ta na 2022, i según nos e siman di seguridat
den tráfiko aki lo ta un oportunidat grandi pa ministerio di VVRP instuí ofisialmente e plataforma
aki, ku lo por tin un gran balor pa nos tráfiko.” Na final, ATSK ta indiká ku nan ta konbensí ku e
gobièrnu aktual aki si lo hasi muchu mas riba seguridat den nos tráfiko.