Minister Rocco Tjon: A PONE E PROME PIEDRA PA STICHTING HUNTO

Minister Rocco Tjon:

A PONE E PROME PIEDRA PA STICHTING HUNTO

 

ORANJESTAD – Diaranson mainta, durante un conferencia di prensa di Gobierno di Aruba, Minister di Husticia y Asuntonan Social Rocco Tjon conhuntamente cu Prome Minister di Aruba Sra. Evelyn Wever – Croes a pone e prome piedra, pa loke muy pronto lo bira Stichting Hunto. E edificio caminda lo bay ubica Fundacion pa Maneho di Adiccion di Aruba (FMAA) y Sociaal Psychiatrische Dienst (SPD) hunto, pa asina alinea procesonan mucho mas miho na otro y eleva e calidad di cuido cu ta brinda na comunidad di Aruba den cuadro di salud mental y adiccion. 

Ta asina cu na oktober 2020, FMAA y SPD a firma un MOU cu e intencion pa uni cu otro den un solo fundacion cu lo yama Stichting Hunto. Esaki a nace a base di un vision caminda tur dos a mira e necesidad pa haci e cuido cu cada un ta brinda mas accesibel y alabes enfoca riba clientenan cu tin un “dubbele diagnostiek” cu un atencion specifico pa mucha y hobennan. E vision ta pa percura cu clientenan por rehabilita y reintegra bek den comunidad door di percura cu e cuido ta accesibel, integral y di un calidad halto pa loke ta trata adiccion y salud mental.

E proyecto aki ta complementa e vision y e plan di maneho di Ministerio di Husticia y Asuntonan Social pa motibo cu e proyecto aki lo conduci na un reduccion di e fragmentacion cu tin den e sector di cuido; reduccion di listanan di espera door di amplia e prome linea di cuido y reduccion di e presion cu tin riba e cuido mas specialisa. Pa por a logra  yega na e momento importante aki, hopi trabou mester a wordo haci, pasobra e exito di e proyecto aki, y e hecho cu e ta bira un realidad no ta depende solamente di SPD y FMAA, pero tin mas factor ta hunga un rol.

Bisando esaki, a tene cuenta entre otro cu palabracionnan di procedura entre stakeholders pero tambe a tene cuenta cu restructuracion di alocacion di fondonan den presupuesto 2022. Pa e motibo aki tambe na fin di aña pasa a sera diferente MOU’s, entre otro uno entre tur stakeholders, den cual a ankra e compromiso pa cuminsa traha mas di serca cu otro, cu e meta final pa haci cuido mas accesibel y eleva e calidad. Di otro banda tambe mester a percura pa haci analisisnan financiero, pa por re-aloca y restructura fondonan, pa e proyecto aki por bira un realidad, pero na final di dia pa por haci mucho mas cu e fondonan limita cu tin.

Por ultimo, e mandatario a manda palabranan di gradicimento pero tambe un pabien na tur stakeholders clave esta SPD, FMAA, FADA, HAVA y RESPALDO como tambe conseheronan huridico y financiero di Ministerio di Husticia y Asuntonan Social. Tambe, a gradici Parlamento di Aruba, pasobra na final di dia mester di un presupuesto aproba pa por ehecuta tipo di proyectonan asina. Lo tin mucho mas Proyecto, cu lo wordo ehecuta ainda e aña aki.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: