Historia ku pueblo di Kòrsou tambe mester sa.

Jonathan Symor, sekretario di Trabou pa Kòrsou ta duna su opinion for di abolishon di esklabitut te ku presente.

 

Despues di a abolí esklabitut na 1815, Hulanda a stòp te na 1863 ofisialmente ku esklabitut. Kiermen mas o menos 50 aña despues. E británikonan a stòp na 1833 i fransesnan na 1848. Merka a stòp na 1865.

 

Despues di abolishon e doño a haña alrederor di Fl. 200,- pa laga kada katibu den libertat. Sierto di nan a keda traha na kas di e doño. E ‘house negro’ a haña pida tereno p’e biba ku planta. Hulandesnan tabata tin haf (foi dje tempu ei) kiermen sierto di e katibunan a bai Willemstad bai traha den haf. Kiermen aki bo ta mira kaba ku semper e hulandes a keda superior riba e katibu.

 

Na 1945 Charter di Nashonnan Uní a ser fundá. Aki den artíkulo 73 ta preskribí kon e kolonisadó tin ku dil, ku e paisnan ku ela kolonisá i kiko ta su obligashonnan pa hasi e paisnan aki soberano. Tambe e ta bisa ku e kolonisadó NÒ mag di mete den gobernashon di e pais kolonisá di ningun forma i no mag di tin ningun figura òf lei kolonial (p.e: gobernadó/COHO).

 

Ken tabata den e komishon di Nashonnan Uní pa representá reino Hulandes???? E mener ku hulandesnan ta haña un heroe: Mr. Willem Drees. Mes un mener ku a sòru pa hasi daño i masakrá hende na Indonesia. 

 

Na 1963 Nashonnan Uní a kuminsa apliká artíkulo 73. Pero Sr. Drees a mira adelantá kiko lo bai pasa si artíkulo 73 di Nashonnan Uní wòrdu apliká, Hulanda lo a pèrdè outoridat riba e islanan den Karibe. Splikando esaki bo por kompronde ku asinaki na 1954 STATÜT a nase huntu ku Sr. Da Costa Gomez. Esaki nan a hiba Nashonnan Uní i bisa ku reino hulandes mes a regla nan struktura estatal ku e STATÜT aki. Pero,……India ku Uruguay no a konfia esaki, di kual nan a laga posibilidat habrí den e Resulushon di Nashonnan Uní, pa si nos no ta di akuerdo nos por bini bèk i kambia esaki.

 

Mas ariba mi a menshoná ku Merka a stòp 1865 ku esklabitut i ku Hulanda a stòp na 1863. Na 1945 Charter di Nashonnan Uní a ser fundá i na 1954 Statüt a bin. Kiermen aki bo por mira ku Hulanda strukturalmente ta keda hasi kambio pa por mantené mando kolonial riba e islanan.

Na 1969 Kòrsou a konosé 30 di mei. Kaminda atrobe den sistema laboral, tabata tin e diskriminashon den hulandes ku yu di tera. Hulandesnan so por bira hefe, maske e yu di tera ta mes of mas bon studiá ku e hefe.

 

Boso sa kiko a faya nos? “STEUNEND MET EIGEN KRACHT DOCH MET HET WIL ELKANDER BIJ TE STAAN”

Einan nos a liberá Hulanda for di su obligashon nan komo kolonisadó.

I aworaki den 2022, Hulanda ke purba rekolonisá nos ku e famoso COHO!!!!

Kiermen NÒ, nos no a bai dilanti for, paso kada bes Hulanda ta krea un sistema pa tin kòntròl riba nos!! Pero tin organisashonnan manera TPK, Fundashon Kòrsou Kaminda pa Libertat i Fundashon Pro Soualiga ku ta mustra Hulanda ku e ta kompletamente robes.

 

Tin un lei mundial ku ta dikta ku pidimentu di despensa ta bai akompañá finansieramente. Eksperto abogado internashonal sr. Coharis mes a bisa esaki. Awor bo por komprondé dikon sr. Rutte no ta masha interesá pa pidi despensa. Anto nan lo puntrabu kiko lo ta e montante ku tin ku paga bèk? Nos tin ku wak bon pa e gobernantenan aktual no bira kobarde bisa un suma mediokre djis pa keda bon ku Hulanda. De Nederlandsche Bank (banko sentral di Hulanda) mes a menshoná un suma ku mester wòrdu BON evaluá. Djis mi ke kòrda nan ku ta Fl. 200,- nan a paga pa kada katibu por a wòrdu liberá. Fl. 200,- e tempu nan ei tabata masha hopi sèn mes. Anto Hulanda tin tur e registronan di katibunan ku el a importá aki na Kòrsou. Kiermen nos por hasi un rekensom hopi fasil si tin mester.