Minister a regla pa pueblo di Kòrsou por disfrutá di lugánan di parker na òrdu  den Punda i Otrabonda?

Na: Minister di Trafiko, transport i Planifikashon Urbano
Sr.  C. Cooper
Berg Arrarat Perceel C
Presente

Willemstad, 22 ougùstùs 2022

Tópiko: Minister a regla pa pueblo di Kòrsou por disfrutá di lugánan di parker na òrdu  den Punda i Otrabonda?

Apresiable minister Cooper,

Durante e reunion públiko fecha 18 febrüari 2022, Parlamento a bai di akuerdo pa gobièrnu firma e kontrato ku Parking Authority ku forsa retro aktivo, esta  pa e periodo di  1 di febrüari 2010 pa 1 di febrüari 2020. Miéntras tantu e lei a pasa bou di e nr. PB 28 di aña 2022 (athunto). Esaki a habri kaminda pa Minister Cooper komo minister di VVRP, por a hiba negoshashon pa yega na  pago di e suma ku PAC debe gobièrnu pa e maneho  for di 2010 te ku  2020.  A palabra ku e montante lo keda stipulá den un proseso di arbitrahe, esta negoshashon, debí ku no ta tur detaye di e kontrato i palabrashonnan a keda atendé i dokumentá for di komienso. Esaki ta importante pa asina e sèn ku Parking Authority debe, por drenta kaha di gobièrnu. Ta p’esei  nos ke sa ku ya a firma e kontrato retro aktivo i tambe ku a finalisá e negoshashon pa e montante ku mester  keda paga na gobièrnu.

1. Minister a firma e kontrato ku PAC , Global Metals N.V kaba? Ki dia esaki a tuma lugá?
2. Kuantu e montante final a bira?
3. Ministerio di Finansa a risibí e montante kaba?

Durante di e reunion di dia 18 di febrüari 2022, Minister a pone parlamento na altura tambe ku  ya a finalisá un destaho nobo pa haña un operador di lugánan di parkeo. Minister a informá parlamento tambe ku pa motibu di privasidat ainda no por a divulgá ken a gana e destaho pero ku pronto lo atendé e tópiko aki tambe. Miéntras tantu ya a pasa mas ku 6 luna i e situashon di parkeo den Punda i Otrabanda a empeorá.

Ta reina un situashon den sentro di siudat kaminda ku esnan ku kier bishita sentro di siudat  no ta haña un lugá di parker ya ku mayoria persona ta para nan outo pa tempu indefiní. Esaki ta okashoná un preshon enorme pa parkeo den sentro di siudat. Suidadanonan ta kore buska basta ratu pa haña un lugá di parker habri. Esaki ta pone ku esnan ku ta bin nos sentro di siudat pa hasi nan diligensia, kumpra un kos, bai un sita i/òf hasi un bishita ta preferá di bai otro kaminda. Nan ta skohe pa ménos posibel bishita nos sentro di siudat. Ku tur konsekuensia  ku esaki tin pa komersio i negoshinan den sentro di siudat.

 

 

Ta nesesario pa trese klaridat den e situashon aki i informá pueblo di Kòrsou ta kiko presisamente ta pasando ku parkeo den sentro di siudat. P’esei nos tin e siguiente preguntanan adishonal pa minister Cooper.

Na aña 2011 a skohe e sistema di parkeo pagá den nos sentro di siudat. Esaki pa regulá parkeo, krea efisiensia i tambe alsa komersio den nos sentro di siudat.

4. Kon leu ta ku e kontrato nobo pa un operador di lugánan di parker den Punda i Otrobanda?

 

5. Kua kompania/ organisashon a gana e destaho públiko i ta bira e operador nobo?

 

6. Ki dia e kompania ku ta enkargá ku parkeo den sentro di siudat lo kuminsá?

 

7. Kiko e maneho di parkeo den Punda i Otrabanda lo bira?

 

Por informá pueblo ta kiko e situashon  awor aki ta? Mirando e urgensia i e e situashon kaótiko di parkeo den sentro di siudat nos ta urgi minister pa kontesta rápido riba e preguntanan aki.

 

Atentamente,

 

 

Zita Jesus Leito, MBA
Frakshon di PAR

 

Addendum: Ordenansa PB 2022/28 data. 15 mart 2022 akuerdo pa atministrá i eksplotá lugánan di parkeo den Punda i Otrabanda.