Minister di Cultura Xiomara Maduro a duna discurso na apertura di tayer pa creador y organisacionnan cultural presenta pa Creative Europe Desk

 

Oportunidadnan pa Aruba haya fondonan y ricibi colaboracion riba tereno cultural na nivel internacional

 

Desde dialuna 22 di augustus pa diahuebs 1 di september proximo representantenan Creative Europe Desk di Hulanda Sr. Jelle Burggraaff y Sr. Albert Meijer, funcionarionan na Creative Europe Desk di Hulanda ta na Aruba, Bonaire y Curaçao pa un bishita di trabao.

E representantenan di Creative Europe Desk lo reuni cu creador- y organisacionnan y lo duna tayernan riba e oportunidadnan pa nos artistanan y organisacionann cultural ricibi fondonan. E tayernan lo ofrece informacion con DutchCulture por sostene y colabora cu e actornan di e mundo creativo y organisacionnan local riba tereno cultural na nivel internacional. Tur esnan den e ramo aki cu ta interesa por a atende e tayernan. A duna informacion kico ta e programa di Creative Europe y pa ken e ta? Cual ta e diferente subsidionan europeo disponibel? Kico DutchCulture ta haci y con nan lo por yuda e creador y organisacionnan cultural amplia nan red di contacto internacional.

 

Minister di Cultura den su discurso a gradici Creative Europe Desk pa nan disponibilidad y Cede Aruba pa por a wordo organisa esaki. Tabata trata di un tayer interesante y informativo referente e programa europeo y caminda a duna informacion y facilita nos artista y organisacionnan cultural con pa aplica pa fondonan di e programa europeo pa cultura. Creative Europe ta un programa di subsidio pa 7 aña cu ta promove y sostene cooperacion internacional den e sector cultural creativo. E programa aki ta dirigi na tur artista y organisacionnan riba e tereno di musica y tur otro forma di arte creativo, pa haci uso di e oportunidad pa por entrega nan peticion na e comision cu ta encarga cu esaki di union europeo. Aruba ta un isla chikito pero nos tin un cantidad grandi di talentonan, cual e mandatario a reconoce e presencia di varios di nan e mainta aki den Cas di Cultura. E talentonan aki ta enrikese nos sector cultural, nos talentonan local tin tremendo potencial pero debi na escases di fondo, nan no por sigui desaroya nan talento y nos sector cultural creativo. E programa pa fondonan europeo ta un oportunidad significativo pa nos impulsa nos sector cultural, especialmente awo considerando e situacion financiero delicado cu nos pais ta pasando aden. E fondonan di e programa europeo lo por yuda nos atende cu e retonan, ofreciendo e sector sosten pa medio di e fondonan disponibel. E intercambio di informacionnan ta necesario cual ta facilita e proceso aki. Nos pais Aruba ta bini na remarke pa e fondonan aki, pasobra nos ta forma parti di reino hulandes cual ta miembro di union europeo. Minister Maduro a sigui trece dilanti cu esaki ta importante pasobra industria creativo ta un di nos sectornan promotedor pa desaroya y diversifica nos economia. Nos ta desea pa esaki crece y prospera y asina stimula innovacion. Den nomber di gobierno di Aruba, e mandatario a expresa palabra di danki na Sr. Jelle Burggraaff y Sr. Albert Meijer pa nan disponibilidad pa ofrece e tayer aki. E informacionnan cu ta wordo comparti lo ta di gran balor pa e sector cultural y creativo di pais Aruba. E mandatario a gradici Cede Aruba pa organisa e evento aki y por ultimo e mandatario a encurasha tur artista pa haci uso efectivo di oportunidad pa crea “network”, tuma nota di e conocimiento y experiencia di e oradornan cu lo ta na beneficio pa yuda nos pais su sector creativo desaroya y crece. Di e presentacion aki ideanan nobo lo por nace tambe pa nos Pais Aruba sigui desaroya den e sector di industria creativo.