VOOGDIJRAAD TA AKLARÁ SU FORMA DI TRAHA

MINISTERIO KONSERNÍ HUSTISIA

 

VOOGDIJRAAD TA AKLARÁ SU FORMA DI TRAHA

PUBLIKÁ RIBA 27 OUGÙSTÙS 2022

Esaki en konekshon ku publikashonnan den media.

WILLEMSTAD – Bureau Voogdijraad a tuma nota di publikashonan ku a bini dilanti den prensa i riba media sosial den kual un grupo di tata anónimo ta duna keho riba e forma di funshoná di e organisashon. Nan ta alegá ku nan bos no ta wòrdu skuchá. Bureau Voogdrijaad ta lamentá esaki pasó esaki ta krea un impreshon negativo i inkorekto. E organisashon no por duna informashon tokante kasonan individual pa protekshon di privasidat di e kliente.

Pa aklará esaki Bureau Voogdijraad ta duna informashon tokante su proseduranan o sea su manera di traha. Bureau Voogdijraad ta un organisashon ku ta resortá bou di Ministerio di Hustisia di Kòrsou. Serka Bureau Voogdijraad e bienestar di e menor ta sentral. Bureau Voogdijraad ta e úniko organisashon ku konforme lei, Kódigo Sivil buki 1 artíkulo 238-243, tin e tarea pa sali na bienestar di tur menor entre 0 pa 18 aña. E edat akí ta ku eksepshon di e hóbennan ku e organisashon ta intermediá p’e pa alimentashon. E organisashon por intermediá den e kaso akí te ku ora e hóben tin 25 aña di edat i ta siguiendo un estudio.

E esensia di Bureau Voogdijraad ta pa hasi investigashon i konsehá. For di 2016 Bureau Voogdijraad a hasi un kambio den su prosedura di traha kaminda, entre otro, ta enbolbí tur tata den tur investigashon, te asina leu ku tin akseso na e tata. Tambe Bureau Voogdijraad ta traha transparente i ta kompartí ku kada kliente kiko e por spera. Ta trata kada kaso riba su mes i ta hasi un investigashon independiente i profeshonal.

Bureau Voogdijraad ta investigá den prinsipio huntu ku e menor, su mayornan (mama i tata) i ambiente sosial kiko ta nesesario pa e menor krese i desaroyá den un ambiente sano. Si ta nesesario e organisashon ta pidi hues pa intervení. E intervenshon semper ta bai tokante medidanan di gran impakto riba e menor i su famia, ku ta protehá mesora òf invadí e derechonan básiko di un famia/bida privá. E interes di e menor ta semper sentral i bienestar di e menor ta e promé konsiderashon den kaso di un posibel intervenshon.

Den práktika Bureau Voogdijraad ta wòrdu aserká pa medio di diferente profeshonal ku ta sali dilanti pa nan kliente, pero e organisashon tin ku bolbe enfatisá ku serka nan durante e investigashon ta e bienestar di e mucha ta sentral. Bureau Voogdijraad ta neutral durante e investigashon i den e konseho na korte. Apesar di esaki chèns ta grandi ku un partido lo ta mal kontentu. For di ora e kaso yega serka Bureau Voogdijraad, en general ta pasó tin un situashon ku partidonan no ta di akuerdo ku otro.

Bureau Voogdijraad semper ta para habrí pa kontestá preguntanan di kasonan individual na esnan konserní i/òf duna informashon tokante nan prosedura (manera di traha). Pa mas informashon por tuma kontakto ku Bureau Voogdijraad via di nan:

Página di “Facebook”: Voogdijraad Curaçao
Numbernan di telefòn: +5999 461-6166, number di ekstenshon 200/204 òf +5999 671-8259 / +5999 671-825

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: