Plataforma ‘100 Women Who Care Curaçao’ ta sigui rekoudá fondo pa yuda nos komunidat!

Plataforma ‘100 Women Who Care Curaçao’ ta sigui rekoudá fondo pa yuda nos komunidat!

Mas di 50 mil florin a keda rekoudá durante 6 aña di eksistensia

Willemstad – Durante di un anochi eksitoso, e grupo di hende muhé ku a partisipá na e reunion di 6 di september 2022 di e inisiativa ˈ100 Women Who Care Curaçaoˈ  , a rekoudá fondo pa Daily Meal Program. E montante ku Daily Meal Program a risibí, ta yuda nan pa nan por sigui duna kuminda na un grupo lubidá den nos komunidat prinsipalmente ansianonan ku no tin famia, stof of frigidaire, drogadikto i migrantenan ku ta biba den situashonan ekstremo di pobresa.

Kon e konsepto di 100 Women Who Care ta funshoná

Ku esfuerso minimal ta logra hasi impakto! Ounke ainda no a logra e kantidat di 100 hende muhé huntu den un enkuentro, ta visibel ku e kantidat di hende muhé ku ta interesá ta krese ku kada enkuentro di ˈ100 Women Who Care Curaçaoˈ. E grupo ta topa un biaha kada trimèster. Den e enkuentro di mas òf ménos un ora, ta skohe pa medio di un sistema di lòt, pa 3 proyekto ku e partisipantenan mes a bini kuné. Representantenan di e proyektonan ta konta kiko nan proyektonan ta enserá i despues e grupo ta skohe pa medio di votashon kua di e proyektonan ta haña e fondonan di e enkuentro. E fondo ta formá pa medio di e montante di 100 florin ku kada hende muhé ta pone disponibel pa medio di deposito. Esaki ta nifiká ku si e grupo yega e kantidat di 100 partisipante, e donashon na e proyekto di eskoho ta bira 10.000 florin. Ku e inisiativa aki, pa aña por yuda 4 organisashon na Kòrsou pa realisá e bon kousa ku nan ta traha pe. Durante di e 6 añanan, inkluso durante di Pandemia, e grupo a rekouda huntu mas di NAF. 50 mil florin ku a keda inverti den 14 organisashon lokal den 15 enkuentro .

ˈ100 Women Who Careˈ na Kòrsou, meskos ku tantísimo inisiativa ku e mesun nomber na diferente pais den mundu, ta boga pa duna donashonnan den nan mes komunidat, sin ku parti di e fondonan ta bai na gastunan di e inisiativa mes. Tur hende ku ta hasi esfuerso pa e inisiativa, ta hasi esaki na un manera boluntario. E grupo ta reuní serka Hofi Cas Cora, ku ta brinda e oportunidat aki pòrnada. Hende muhénan ku ke djòin e inisiativa aki, por  hasi esaki via di e grupo riba Facebook bou di e nomber ˈ100 Women Who Care Curaçaoˈ of manda un mensahe pa 100womenwhocarecuracao@gmail.com. Organisashonan ku ta en buska di fondo tambe ta keda invita pa hasi kontakto.

Siguiente enkuentro ta dia 6 di desember próksimo, pa 6’or di atardi na Hofi Cas Cora!