Parlamento tin buraku grandi den su lista di logro. Mester reuní ku bista riba bienestar konkreto.

Parlamento tin buraku grandi den su lista di logro.

Mester reuní ku bista riba bienestar konkreto.

 

Willemstad — Na okashon di apertura di un aña parlamentario nobo, presidente di parlamento a konvoká un konferensia di prensa pa papia di logronan di parlamento. Ku duele Partido PIN i míles di hende buskando trabou ta konstatá ku konvoká un simpel reunion pa sigui trata e lei riba kanabis medisinal si NO ta riba e lista di logro dje presidente aki di parlamento. Di aya banda, ku ‘spit di djèt’, ya a lanta komishon pa prepará edifisio nobo pa parlamentarionan si.

 

Praatjes vullen geen gaatjes

E kabes aktual di parlamento ta bria komo motivador i pasifikadó. Sinembargo ta bon pa sra. America kòrda tambe riba su ròl polítiko den sentido di produsí adelanto, bienestar i desaroyo konkreto. Pa esei tin biaha mester habri plataforma pa forsa klaridat di nos mandatarionan.

Tur hende sensato ta mira ku kresementu ekonómiko duradero t’e uniko manera pa Kòrsou sali foi slump. Pesei PIN ta desepshoná ku apesar di nos yamada, apesar di petishon formal di otro partidonan den oposishon, i apesar di e deseo di algun bos den koalishon mes, tòg presidente di parlamento ainda no a yama e reunion pa sigui trata e lei riba kanabis medisinal. Esei ta un buraku grandi riba e lista di logro di e koalishon aktual i di parlamento su presidente.

 

Pregunta

Si prensa mes no hasi e pregunta, PIN ta spera ku sra. presidente di parlamento di su mes lo usa e enkuentro ku prensa pa splika dikon ainda e no a kumpli ku e gritu di mayoria frakshon den parlamento pa konvoká e reunion pa sigui trata e lei riba kanabis medisinal.

 

Un buraku asina grandi riba e lista di logro di parlamento ta inakseptabel paso tin míles di hende wardando oportunidat nobo di trabou. Asumiendo ku no ta deliberadamente e frakshonnan di MFK i PNP ke bòikòt henter un sektor di kresementu real, Partido PIN ta konsiderá un buraku asina innesesario tambe paso al final ta mayoria di parlamento lo disidí tòg riba aprobashon dje lei.

 

Kompas

Partido PIN ta kere ku sra. America tin sufisiente outoridat moral pa krea espasio pa sali for di lòk di partido, asumí su rol di presidente, yama reunionnan ku si ta kontribuí konkretamente na adelanto di nos komunidat, i asina perfekshoná su lista di logro. Presidente di parlamento debe nos pais i nos ekonomia e esfuerso ei.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: