A RENOBA WARDA DI POLIS DI NOORD Y MUY PRONTO PLAZA TINO RUIZ LO BIRA UN REALIDAD
Minister Rocco Tjon:
A RENOBA WARDA DI POLIS DI NOORD Y MUY PRONTO PLAZA TINO RUIZ LO BIRA UN REALIDAD
ORANJESTAD – Dialuna mainta, durante conferencia di prensa di Gobierno di Aruba, Minister di Husticia y Asuntonan Social Rocco Tjon a elabora riba e warda di polis di Noord cual a keda completamente renoba. Banda di esaki, e trabounan pa loke ta e busto di Tino Ruiz ta kedando cla y dentro di poco lo tin un destaho pa asina compania ganado por inicia cu e trabounan pa loke lo bira Plaza Tino Ruiz, situa dilanti warda di polis di Noord.
E proyecto aki ta uno sumamente importante, principalmente pa Cuerpo Policial di Aruba, mirando cu e proyecto aki ta consisti di tres parti. Pa loke ta e trabounan cu mester sosode na e warda di Polis mes, esaki a inicia algun tempo atras y siman pasa a aproba e siguiente fase di e proyecto aki cual ta e plaza Tino Ruiz den feliz memoria. Manera ta conoci, e proyecto pa traha e busto di Tino Ruiz ya caba a inicia y ta den su fase final, y muy pronto lo wordo aloca dilanti warda di Polis di Noord cual lo bira Plaza Tino Ruiz. Pues, manera a menciona, esaki ta un proyecto sumamente importante pa Cuerpo Policial mirando e nificacion cu esaki tin pa nan, pero tambe esaki ta e muestra di e aprecio cu ambos Cuerpo Policial y Gobierno di Aruba tin pa e trabou duro cu nos Agentenan Policial ta haci.
Pa loke ta e busto di Tino Ruiz, ya Artiopia ta trahando riba esaki pa algun tempo y nan ta den e fase final. Otro luna e busto lo wordo treci Aruba, pa despues e trabounan pa e plaza por inicia, mirando cu e busto mester ta fisicamente presente pa asina na Aruba mes nan por traha e pia riba cual e busto lo bay wordo aloca. Durante ful e proceso aki, e familiaresnan di Tino tawata envolvi. Nan mes a bay Colombia tambe caminda e busto a wordo traha pa nan mes por a wak, duna nan acuerdo pa cu e producto final, te hasta yuda traha riba e busto, cual Sr. Senchi, kende ta encarga cu e proyecto aki, a aprecia hopi.
Por ultimo, e mandatario a indica cu fin di luna DOW lo inicia cu e destaho, pa e proyecto di Plaza Tino Ruiz, caminda e partido cu gana e destaho, lo por inicia cu e trabounan pa despues di 50 dia plaza Tino Ruiz por bira un realidad. Ta papia aki di un inversion di alrededor di mey miyon florin pa por realisa e proyecto aki.
