PROME MINISTER TA FELICITA TUR E GRADUADONAN Y TA DESEA NAN HOPI EXITO DEN FUTURO

 

Prome Minister Evelyn Wever-Croes:

 

PROME MINISTER TA FELICITA TUR E GRADUADONAN Y TA DESEA NAN HOPI EXITO DEN FUTURO

” E diploma cu bo tin den bo man, ta e yabi pa bo futuro, y abo ta dicidi kico bo ta haci cu n’e”

 

ORANJESTAD – Durante e ultimo simannan, Prome Minister Evelyn Wever-Croes cu honor a atende e graduacion di varios scol. Prome Minister a indica, cu pa mira cuanto graduado tabata tin e aña aki, ta algo cu Aruba completo mester sinti contento y orguyoso, pasobra esaki ta e fundeshi di formacion di un sociedad fuerte.

 

Prome Minister ta gradici cada un di nan pa nan esfuerso den logra haci e aña aki uno exitoso un biaha mas. Tambe, Premier ta gradici tur maestro pa e pasion y dedicacion cu nan a bin ta eherciendo durante añanan educando nos hobennan y fortalece e fundeshi primordial di enseñansa.

 

“Cada clausura ta un comienso nobo. Pa nos graduadonan esaki ta un comienso nobo. E diploma cu bo tin den bo man, ta e yabi pa bo futuro, y abo ta dicidi kico bo ta haci cu n’e. Cu Dios bendiciona cada un di boso riba boso caminda, pa tuma e miho decisionnan, y pa boso ta exitoso den boso estudio. Na e mayornan cu mester habri hala y laga e yiu bay studia den exterior, mi ta desea hopi forsa, pasobra e ta un di e tareanan mas dificil como mama. Confia cu e fundeshi di norma y balornan cu boso a construi pa boso yiunan, lo sa di guia nan den e trayecto nobo. Hopi pabien y exito na tur e graduadonan” Prome Minister a expresa.