“OPEN SCIENCE AWARD” PA REGISTRO DI KATIBUNAN DI SÜRNAM I KÒRSOU

MINISTERIO KONSERNÍ MANEHO DI GOBERNASHON, PLANIFIKASHON I SERVISIO PÚBLIKO

 

“OPEN SCIENCE AWARD” PA REGISTRO DI KATIBUNAN DI SÜRNAM I KÒRSOU

PUBLIKÁ RIBA 14 SÈPTÈMBER 2022

WILLEMSTAD – Archivo Nashonal di Kòrsou huntu ku Archivo Nashonal di Sürnam i Radboud Universiteit Nijmegen a gana un premio di “Open Science”. Esaki den e ròl di desaroyo di Banko di Data históriko tokante Registronan di Katibu di Sürnam i Kòrsou. E premio a keda otorgá dia promé di sèptèmber último na Amsterdam.

E hurado a eligí a base di e forma kon Archivo Nashonal a yega na hasi e archivonan aksesibel pa públiko, pa proyektonan kultural i pa investigashon di pal’i famia. Ku yudansa di hopi boluntario i sosionan den e kaso akí, archivonan di Sürnam i Kòrsou huntu ku Radboud Universiteit a konkretisá e proyekto akí.

E organisashon di e Festival Nashonal di Siensia Habrí ta premia i rekonosé investigadonan ku a usa Open Science pa hasi mas aksesibel, tranparente òf reprodusí su investigashon. Ta konsentrá e atenshon riba partisipashon sosial, den e kolaborashon entre sientífikonan i personanan pafó di e akademia. Esaki partikularmente ta importante.

Registro di katibunan
Awor tur informashon spesial pa investigashon sientífiko i pa e personanan ku ta buska nan antesesornan, ta ‘online’ gratuitamente. For di 2017 Archivonan Nashonal di Sürnam i Kòrsou huntu ku universidatnan di Anton de Kom (Sürnam) i Radboud (Hulanda), a traha riba datonan demográfiko di poblashon di Sürnam i Kòrsou di e añanan 1830 te 1950 dor di hasi un investigashon ku mil boluntario.

Pa por a logra e propósito akí Archivo Nashonal di Kòrsou mester a ‘indexeer’ i digitalisá su archivonan. Despues boluntarionan a kombertí e trabou den un database ku ta pone ku awendia tur hende por buska nan antepasadonan ‘online’. For di 17 di ougùstùs 2020 registronan di katibunan di Kòrsou ta riba website di Archivo Nashonal di Kòrsou: www.archivonashonal.cw.

Share this page to Telegram

This site uses Akismet to reduce spam. Learn how your comment data is processed.

%d bloggers like this: