Boletin spesial pa mal tempu

Boletin spesial pa mal tempu

Meteo Kòrsou a konstatá ku ta biba pregunta den komunidat, si ayera tabata posibel pa alertá komunidat mas tempran. Lamentablemente esaki no a resultá posibel. Loke hustamente ta típiko pa e tipo di wer spesífiko ku a presentá su mes ayera, ta ku e por kambia basta apruptamente. Ayera en bèrdat esaki tabata e kaso. Den kaso asina Meteo ta komuniká mas lihé posibel i e medio di mas efektivo ta emití Boletin Spesial na interesado nan via di number +5999 560 1089 di Whatsapp, Website (www.meteo.cw), Facebook (Meteo Korsou) i Weather-app.
For di den wikènt siklon Fiona tabata situá nort di Kòrsou i aktualmente e ta ubiká nort di region di Karibe. Esaki a resultá den un bientu suak for di sùit aki na Kòrsou. Meteo tabatin èkstra atenshon pa e patronchi di tempu aki, ya ku esaki hopi biaha por resultá den mal tempu pa nos ku ta bini for di sùit. Tambe por bira kalor.
Ayera tardi, ora e Meteorólogo di turno a konstatá ku tabatin un menasa pa mal tempu agudo, inmediatamente a saka un Boletin Spesial pa mal tempu (kódigo hel) alrededor di 17:40. Manera ta kustumber ora wer kambia apruptamente, ta emití Boletin Spesial. Despues di esaki a duna entrevista tambe na diferente radio i televishon.
E mal tempu a yega Kòrsou su kosta alrededor di 19:15 anochi na partinan ost i despues gradualmente riba otro partinan di e isla. Alrededor di 02.00 di mardugá, ora a mira ku ya no tin menasa pa mal tempu, a kanselá e Boletin Spesial.
Meteo ta konsehá un i tur pa keda sigui nos informashonnan, debí ku e situashon di tempu pa e proksimo 2 dianan lo keda similar. Si konstatá ku tin mal tempu na kaminda, lo bolbe emití un Boletin Spesial pa esaki, entre otro pa medio di e broadcast nan menshoná.
Meteo ta invitá tur hende ku ainda no ta aboná riba e servisio di broadcast di Whatsapp (5999 560 1089), pa hasi esaki i asina semper risibí mensahe den kaso di kambio aprupto di wer.
Por sigui nos boletinnan a traves di nos website (http://www.meteo.cw), nos página di Facebook (http://www.facebook.com/Meteorological.Department.Curacao/.), nos app Curacao Weather i tambe via di WhatsApp (+5999-560-1089).
VIGILANDO WER PA PROTEHÁ BIDA I PROPIEDAT
Share this page to Telegram

This site uses Akismet to reduce spam. Learn how your comment data is processed.

%d bloggers like this: