Gabinete Schotte nunka a fia sen serka Hulanda.
Pero PAR sí a bende nos outonomia pa un saku di plaka.

BREAKING NEWS

Gabinete Schotte nunka a fia sen serka Hulanda.

Pero PAR sí a bende nos outonomia pa un saku di plaka.

WILLEMSTAD – Promé ku 10 di oktober 2010 gobièrnu sentral di Pais Antianan Hulandes i gobièrnu di Teritorio Insular di Kòrsou tabatin un debe na balor di NAf 5.3 miar. Na aña 2010, na momento ku Gabinete Schotte (MFK, PS, MAN) a hasi su entrada, 70% (NAf 3.7 miar) di e debenan akí a keda saniá i a refinansiá e 30% restante den forma di 5 bono ku a suma un montante di NAf 1.6 miar.

Esakinan na un interes supstansialmente mas abou ku e debe anterior. Esaki ta nifiká ku riba 15 di oktober 2010, Pais Kòrsou a inisiá ku un debe na balor di NAf 1.6 miar enbes di NAf 5.3 miar. Den e 23 lunanan ku Gabinete Schotte a sinta, di oktober 2010 te ku sèptèmber 2012, nan NO a fia sen serka Hulanda.

Kontrario na lokual parlamentario i lider polítiko di partido PAR a anunsiá públikamente, Gabinete Schotte nò a hinka Kòrsou den (èkstra) debenan kuantioso ni a kibra rèkor den fia sen. Gabinete Schotte nunka a fia sen serka Hulanda. E gabinetenan ku a sigui, sí a fia i pone ku aktualmente Pais Kòrsou tin un debe di NAf 3.4 miar. E rèkor di mas grandi ta e fiansa di NAf 1 miar ku
Gabinete Rhuggenaath a hasi serka Hulanda den kuadro di e pandemia di COVID-19. PAR a bai di akuerdo ku e Landspakket i di e forma akí a bende nos outonomia pa un saku di plaka.

Na momento ku hasi fiansa serka Hulanda, nan ta mara esaki na kondishon i Gobièrnu di Kòrsou mester hasi sierto reformanan. Hulanda ta vigilá esaki severamente i kada kuartal ta duna nos mandatarionan un sifra di rapòrt. Gobièrnu awor mester konsultá ku Hulanda riba temanan ku segun nos Statüt normalmente nos mandatarionan mes por a disidí riba dje.

Na momento ku un minister ke traha un plan van aanpak òf un proposishon di lei, via Nationale Hervormingscommissie e dossierhouder (esun ku ta atendé e fail) ta konsultá ku e ámtenar di ministerio di Binnenlandse Zaken en Koninkrijksrelaties (BZK). Te ora BZK duna lus bèrdè, e minister por bai Konseho di Minister pa aprobashon. Despues e ta kana su kaminda bai SER, RVA i despues numa e proposishon di lei ta yega Parlamento. Partido PAR a mina nos outonomia komo Pais dor di firma e Onderlinge Regeling Landspakket.

Na momento ku Gabinete Pisas II a sinta na aña 2021, a risibí ayudo di likides di Hulanda na balor di NAf 244 mion, pa motibu ku Gabinete Rhuggenaath a laga nos kaha Nashonal práktikamente bashí. Servisio di impuesto pa años nò tabata pone aanslag i Ontvanger nò tabata hasi kobransa manera debe ser. Manera ta konosí, pa e ultimo kuartal di aña 2021 i aña 2022 kompletu nò tabata nesesario pa sigui hasi fiansa pa Pais Kòrsou. Kada kuarta Hulanda ta puntra Gabinete Pisas II si nan ke sosten di likides (liquiditeitssteun) i minister Silvania ta ninga rotundamente.

Aktualmente minister Silvania, huntu ku su ministerio i demas kolaboradó, ta hasiendo su máksimo esfuerso pa por refinansiá e debenan ku e gabinetenan anterior inkluso partido PAR a hinka Pais Kòrsou aden. Ku esaki nos por bisa ku MFK sí a kibra rekòr den stòp di fia sen serka Hulanda i den esfuersonan pa refinansiá e debenan ku e gabinetenan anterior a krea pa Pais Kòrsou.

Share this page to Telegram

This site uses Akismet to reduce spam. Learn how your comment data is processed.

%d bloggers like this: