Ministerio di Finansa, GSH i APC ta evaluá posibilidatnan pa aliviá depositantenan di Girobank mas tantu posibel.

WILLEMSTAD – Na aprel 2021 a traspasá e kartera di kredito di Girobank pa GI-RO Settlement Holding BV (GSH). GSH ta kreá dor di Banko Sentral di Kòrsou i St. Maarten (CBCS) i ministerio di Finansa pa por yega na un likidashon kontrolá di Girobank. Un grupo chikí di profeshonalnan bankario i finansiero ta forma parti di GSH. GSH tin dos tarea kual ta paga e depositantenan, i paga e fiansa ku Pais Kòrsou a pone disponibel pa GSH.

Na momento ku GSH kumpli ku su obligashon ku gobièrnu (un fiansa ku gobièrnu a duna GSH a base di un fiansa ku gobièrnu a optené di Hulanda), e restante ta keda usá pa paga e depositantenan ku nò a haña 100% di nan depósitonan (ainda). Tin 30 depositante ku sumanan riba NAf 1.2 mion ku, a base di e modelo ku CBCS a skohe pa terminá e proseso di Areglo di Emergensia di Girobank, probablemente lo sufri daño finansiero kuantioso. Ta papia akí di fondonan di penshun, direktiva di skolnan, entidatnan semi gubernamental i empresanan finansiero.

E areglo entre GSH i gobièrnu tin algún implikashon ku mester wordu revisá, por ehempél gobièrnu tabata akshonista minoritario den Girobank pero tòg gobièrnu ta esun ku ta karga ku e kostonan di e solushon. A base di e areglo, gobièrnu su debe públiko a oumentá ku NAf 454 mion. E debe nò ta konsekuensia direkto di maneho di gobièrnu, pues ta nesesario pa buska un solushon pa esaki.

APC tin tres ròl den e ehersisio akí, kual ta (1) èks ko-akshonista di Girobank, (2) depositante i komo (3) doño di APC Bank, CHB i PSB. APC komo kliente di Girobank, huntu ku algun otro mas, nò a haña 100% di nan depósitonan ainda. Esaki kontrali na esnan ku tabatin un deposito te ku NAf 1.2 mion. Esaki ta hasi APC un partner importante den e proseso aki.

Entre otro pa e motibunan menshoná resientemente ministerio di Finansa a sinta na mesa huntu ku e representantenan di GSH i APC pa deliberá tokante posibel solushonnan pa e implikashonnan ariba menshoná. A inventarisá diferente opshon i alternativa pa e situashon aktual promé ku tuma desishon. Di akuerdo ku lei, e ophetivo mester ta pa protehá e interes di e depositantenan. Pais Kòrsou, ku a asumí e responsabilidat pa karga e kostonan di e solushon, mester por hasi esaki na un manera ku ta forma ménos gastu pa gobièrnu i konsekuentemente pa pueblo di Kòrsou.