DELEGASHON DI KÒRSOU A SALI PA ASISTÍ NA KONGRESO INTERNASHONAL DI ICPO-INTERPOL

Ayera delegashon di Kòrsou na nòmber di Ministerio di Hustisia enkabesá pa Sr. Hato a sali pa asistí na e di 90 kongreso internashonal di INTERPOL, ku e aña aki ta tuma lugá na New Delhi, India. Manera ta konosí pais Kòrsou ta un di e 195 paisnan miembro di e prestigioso organisashon di INTERPOL.

Na e kongreso, kual ta e organo di mas haltu di e organisashon, ta atendé diferente temanan e.o. programa di aktividatnan pa aña 2023 i indikashon di presupuesto pa añanan 2024 i 2025. Tambe ta diskutí strategianan pa kombatí i prevení krimennan ku ta mina i krusa frontera i presentá mekanismonan pa mitigá esakinan.

Banda di e temanan ariba menshoná minister tin tambe algun reunionnan bilateral planiá ku sierto partnernan internashonal pa fòrtifiká lasonan di kooperashon i asina yuda kombatí krimen ku aún mas forsa den nos pais. E kongreso ta tuma lugá di 18 pa 21 di òktober 2022 i lo konta ku presensia di delegashon di Hulanda i Minister di Hustisia di Aruba.