Sindikato ABVO mester atendé ku su miembronan

Sindikato ABVO mester atendé ku su miembronan

 

 

Dia 27 i 28 di òktober próksimo sindikato ABVO lo bai tin su kongreso anual kaminda direktiva tin ku duna kuenta i rason na miembronan.

 

Komo un miembro ku ta paga mi kontribushon mi ta eksigí pa mi organisashon ta un organisashon desente i ta kumpli ku regla.

 

Artíkulo 13 insiso b di reglamentu doméstiko ta bisa ku 3 siman promé ku un kongreso tuma lugá direktiva ta obligá pa manda relato finansiero i relato di direktiva pa e represente di e diferente gruponan di servisio. Via di e representantenan aki nos komo miembro ta haña bista kon e direktiva a funshoná i kon e situashon finansiero ta.

 

Otro siman e kongreso tin ku tuma lugá i te ainda e direktiva di ABVO no a manda e relatonan pa miembronan por tuma nota i hasi pregunta. Komo miembro mi ta spera ku no ta den renion purá purá lo entregá esakinan. Komo miembro nos tin derechi di risibí i analisá e dokumentonan promé ku reunion pa por instruí nos delegado di servisio pa hasi pregunta i buska aklarashon.

 

Ta fresku den nos memoria ainda kon e legalidat di e direktiva aki tabata ampliamente den diskushon. Meskos e uso di fondonan di nos ku ta miembro.

Ta den e kongreso aki e direktiva aki tin ku trese klaridat pa miembronan si nan ta un direktiva legal si òf no i ku nan ta atende responsabelmente ku nos fondonan di kontribushon.

 

Ta masha bon ku ta atendé nos interes di 12.5% den bloke di 6, pero ta hopi  importante tambe ku nos tin un sindikato legal i ku ta kumpli ku regla na interes di miembronan.

 

 

18 di òktober 2022

 

 

Sr. Shandell Matrono

Miembro di ABVO

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: