Riba petishon di èks-minister Römer a traha 23 rapòrt riba HNO-CMC

 

 

Willemstad – Manera kustumber e lider di frakshon di MFK, sr. Thodé ku furia di masbangu ta zundra den un kakafonia kompletu pa skondé e hecho ku país ta den problema serio ku menos buelonan di KLM, barionan kompletu sin awa i koriente, refineria te ainda riba bloki i un ‘blamage’ total ku un kos simpel manera un emblema. Komo kortina di huma e biaha aki sr.Thode ke start un were were ront di e rapòrt di Nederlandse Zorgautoritiet (NZa). Den su raport NZa ta duna su ánalises di e situashon di CMC i ta formulá su rekomendashonnan kon pa atendé nan. E profeshonalnan di CMC ya a duna nan reakshon riba e rapòrt i hasta a pidi pa publika e rapòrt kompletu. Sr. Thodé sin embargo no ta referí na e rekomendashonnan i solushonnan pasobra zundra, borota i agitá ta mas fasil ku goberná.

 

Konteo

PIN ta remarká ku, kontrali na lokual sr. Thodé  ta trese dilanti, no ta un (1)  rapòrt di SOAB tin, sino, un total di dies nuebe (19) rapòrt traha riba petishon di èks-minister Römer!

Ademas Kontraloria General di Kòrsou (ARC) a traha kuater(4) rapòrt, esta (a) Hospital Nobo Otrobanda: Bouw en Transitie – Doelmatigheid; (b) Hospital Nobo Otrobanda: Uitputting begroting – Doelmatigheid; (c) Hospital Nobo Otrobanda: Zorgaanbod – Doelmatigheid; (d) Hospital Nobo Otrobanda: Duurzaamheid exploitatie – Doelmatigheid. E rapòrtnan aki ARC a traha riba petishon di Staten despues ku sra. Römer a pidi Staten pa koperá i pidi ARC pa investigá e proyekto di Hospital Nobo Otrobanda.

Pues ta un total di 23 rapòrt a keda traha riba petishon di èks-minister Römer pa por haña bista riba entre otro: konstrukshon di CMC, finansiamentu, uso i atministrashon di fondo, gastunan èkstra i eksplotashon komo hospital.

 

Por sierto tin tambe e ‘Tussentijdse Evaluatie, dec 2016’, trahá riba instrukshon di èks-minister Victorina i entregá na Staten dor di èks-minister Gregoria.

Tur huntu un total di 24 rapòrt.

 

Inkrehibel

Partido PIN ta puntra kon por tuma sr. Thodé na serio si e no sa mes ku tin un:

1. “Regiegroep” formal, bou di presidensia di dr. Caryl. Monte, pa atendé gastunan di salú;
2. Grupo di trabou (werkgroep) ku segun un  dekreto ministerial (MB) ta kontrolá gastunan di CMC antu ku e grupo di trabou ei ta konsistí di Curaçaose Zorgautoriteit in oprichting (CZA i.o.), GMN i SVB;
3. Projectgroep Verduurzaming, ku ta konsistí di CZA i.o., GMN, SVB i CMC.

 

Deskualifika

Por último PIN ta musta riba e echo ku for di ougùstùs 2017, ni 2 luna despues di bira minister di salu, ora èks-minister Römer a mira konstrukshon di  hospital para ketu ku bòshi claim riba gobièrnu, e mes mester a roga pa un enkuesta parlamentario riba e asuntu. Awe e enkuesta ei ta den man di Partido MFK. Ki dia esei esei ta start?

Miéntras ku sr. Thode no por sikiera motivá su koleganan pa start e enkuesta, e ta deskualifika su mes pa sigui duna komentario riba e situashon di CMC. Loke si e mag hasi ta aportá solushon.