Partido MEP: ACTIVIDAD DI FAMIA NA CEDE DI MEP

Partido MEP:

 

ACTIVIDAD DI FAMIA NA CEDE DI MEP

 

 

Lider di MEP, señora Evelyn Wever-Croes ta haci un invitacion na pueblo di Aruba completo pa asisti na un actividad di famia na Cede di MEP na Santa Cruz cu lo tuma luga diadomingo dia 30 di October cuminsando pa 4or di atardi y lo termina den oranan di anochi. Esaki lo bay ta un atardi yena cu hopi ambiente familiar. Lo tin bar y cushina bon surti. Partido MEP cu e actividad aki, lo contribui na instancianan den nos comunidad.

 

CONGRESO: UN ARUBA, UN LIDER!

Pa e parti formal di e programa, lo tuma luga e Congreso: Un Aruba, Un Lider! na unda cu Lider di MEP, señora Evelyn Wever-Croes lo wordo aclama oficialmente y publicamente un biaha mas como Lider di MEP pa e siguiente 4 aña, sosteni door di Directiva y Partido MEP completo. Partido MEP ta hopi orguyoso y satisfecho cu e trabou cu Lider di MEP ta haciendo como Prome Minister di nos pais y un biaha mas ta deposita confiansa den dje pa e siguiente periodo.

 

ENTRETENIMIENTO:

E parti cultural ta consisti di Caha di orgel di Artur Kelly; ganado di festival di Un Canto pa nos Himno y Bandera, Ruth Garie; show di baile Gucci Dancers; Mini D’licious; y TSUNAMI.

 

PA E MUCHANAN:

Pa e chikitonan, lo tin ‘Kids Corner” den terasa di HOT entre otro lo tin un mini dino jump, auto y pool cu bala. Pa cuida nos muchanan lo tin un crew member den e Kids Corner.

 

HOBENNAN:

HOT ta reconoce miembronan di Hot y ta habri inscripcion pa tur hoben por aplica pa drenta den HOT. Por pasa inscribi den oficina di HOT. Tambe lo tin un booth pa haya informacion pa postula pa directiva di HOT.

 

EXPO:

Den e sala grandi lo tin un Expo di historia y trayectoria di Partido MEP. E expo

lo keda habri henter siman despues di e actividad pa scolnan por pasa bishita.

 

SORTEO DI E RIFA:

Pa 7.00-7.15pm lo tuma luga e sorteo di e Rifa #stabielcumep. Exito na tur cu a cumpra rifa y contribui asina un biaha mas na nos Partido.

 

 

 

PLAK STICKER #STABIEL Y PARTI TSHIRT:

Ya caba den fin di siman a cuminsa sinti e ambiente familiar na Cede di MEP unda cu Partido a tene su accion di plak sticker #stabiel y parti tshirt. Candidatonan tawata presente y hunto cu autonan cu tawata pasa pa plak sticker of saluda, a crea un ambiente ameno. Lider di MEP a haya e oportunidad pa saluda y scucha ciudadanonan y hasta a yuda cu yena formulario di impuesto.

 

“Den nomber di henter famia di MEP, mi ta invita abo y bo famia pa bin celebra hunto cu nos diadomingo awo, sea cu bo ta nos votado of no, tur hende ta bon bini. Despues di dos aña porfin nos por bin bek hunto pa goza un diadomingo atardi den ambiente familiar”, Lider di MEP señora Evelyn Wever-Croes a expresa.

 

Share this page to Telegram

This site uses Akismet to reduce spam. Learn how your comment data is processed.

%d bloggers like this: