Kompetensia pa e studiantenan di HAVO i VWO na Kòrsou i Sint Maarten CBCS Best Economic Research Award 2023

Kompetensia pa e studiantenan di HAVO i VWO na Kòrsou i Sint Maarten
CBCS Best Economic Research Award 2023

WILLEMSTAD/PHILIPSBURG – Best Economic Research Award (BERA) a tuma lugá pa di dos
biaha e aña akí. Awor ku e ta tras di lomba, Centrale Bank van Curaçao en Sint Maarten (CBCS)
ta anunsiá ku e kompetensia lo bolbe den su di tres edishon na 2023. Studiantenan den nan
delaster aña eskolar di tur HAVO i VWO na Kòrsou i Sint Maarten ta keda invitá pa entregá un
‘profielwerkstuk’ di ekonomia, riba un tópiko relevante pa e ekonomianan di e union
monetario. Tantu e studiante ganadó komo e skol en kuestion lo risibí un premio atraktivo di
CBCS. E último fecha pa e studiantenan di HAVO i VWO entregá nan profielwerkstuk ta 3 di
mart 2023.

CBCS a introdusí e premio BERA na 2018 pa asina stimulá investigashon relashoná ku e
ekonomianan di Kòrsou i Sint Maarten. Fuera di esei, CBCS ta spera di inspirá studiantenan di e
manera akí pa sigui un studio riba tereno di ekonomia.
Ta otorgá premio den kuater diferente kategoria: HAVO, VWO, bachelor i master. Awe, CBCS a
lansa e kompetensia na nivel di HAVO i VWO. Na komienso di 2023, lo anunsiá ora start e konkurso
pa e kategorianan mas avansá.
CBCS lo otorgá premionan atraktivo komo insentivo pa e studiante- i skolnan. Kada ganadó na
nivel di HAVO i VWO lo risibí un premio kèsh na balor di NAf. 2.500 i un trofeo, mientras ku e skol
ganadó den kada kategoria lo risibí un premio di NAf. 5.000 i un trofeo.
Resientemente, CBCS a organisá seshon informativo pa e dosentenan di e skolnan HAVO i VWO
na Kòrsou i Sint Maarten. ‘Nos ta masha kontentu di mira kuantu entusiasmo e dosentenan a
ekspresá pa e programa akí i e kompromiso ku nan ta demostrá animando nan alumnonan pa
partisipá’, segun Direktor Ehekutivo di CBCS, Sr. José Jardim. Dia 5 di novèmber 2022, lo tene un
seshon informativo spesial pa alumno. Alumnonan ta invitá pa bin e seshon na CBCS na Skalo òf
partisipá pa medio di Teams. Mester registrá promé ku dia 3 di novèmber 2022 pa partisipá. Pa
registrá bishitá http://www.centralbank.cw/event-registration.
CBCS ta spera ku un kantidat grandi di alumno na Kòrsou i Sint Maarten lo sinti nan motivá pa
partisipá den e kompetensia akí. E ganadónan lo ser kontaktá riba dia 21 di aprel 2023.
Mas informashon tokante e kondishonnan pa partisipá, e reglanan di e kompetensia i e kriterionan
di evaluashon ta disponibel na
http://www.centralbank.cw/education/cbcs-best-economic-research-award-2023.
Willemstad, 26 di òktober 2022
CENTRALE BANK VAN CURAÇAO EN SINT MAARTE

Share this page to Telegram

This site uses Akismet to reduce spam. Learn how your comment data is processed.

%d bloggers like this: