Willemstad:resientemente un kantidat grandi di personal di SDKK a rekordá i selebrá e echo ku 25, 30, 35 i 40 aña pasa nan a drenta servisio di gobièrnu. Tambe a tuma despedidá di koleganan ku a baha ku penshun bon meresí.Tabata durante un seremonia bunita i ameno a honrá tur e hubilarionan ku durante hopi aña a laborá na prizòn. E tema di e anochi tabata titulá “Ban Sigui Perseverá”.

Pa trata e tema aki di ban sigui perseverá, sr.Urny Floran komo eks direktor di SDKK tabata orador invitá i a trese un mensahe di reflekshon i motivashon na tur presente. Na e okashon aki komishon organisasado huntu ku tim di maneho di prizòn a duna sr.Urny Floran un homenahe komo muestra di graditut pa su dedikashon i servisio durante 42 aña den Hustisia.Tambe durante e anochi aki a hiba palabra direktor suplente di SDKK, sr.Richenald Ricardo, Minister di OWCS sr.Sithree van Heydoorn den representashon di Minister di Hustisia sr. Shalton Hato i representantenan di sindikatonan ABVO, STRAF i SAP tambe tabata tei presente.

sr.Marlon Jamanika komo Guiador di Spiritual di SDKK tambe a enfoká riba e tema ariba menshoná i a finalisá esaki ku un orashon di perseveransia. E anochi a kontinua den un ambiente ameno i festivo ku varios presentashon musikal.

Gerensia di SDKK ta gradisí tur e hubilarionan pa nan trabounan desplegá durante tur e añanan di servisio i ta deseá e koleganan penshonado tur klase di éksito pa ku futuro.